Án Jefta We Pwon

KA FEN eáni eú pwon, nge mwirin, ka meefi pwe a weires óm kopwe apwénúetá? A ina usun ei mwán lón ei lios, iwe ina ewe popun a kon letipechou. Ena mwán, itan Jefta i emén soukapwúng mi pwora lón Israel.

Jefta a manaw lón ewe atun ekkewe chón Israel rese chúen fel ngeni Jiowa. Ra liwiniti ar féri minne mi ngaw. Iwe, Jiowa a mut ngeni ekkewe chón Amon ar repwe eriáfféúr. Pokiten ei ekkewe chón Israel ra sié ngeni Jiowa: ‘Ám aua fen tipis ngonuk. Kese mochen kopwe selánikem!’

Ekkewe aramas ra niamam ren ekkewe mettóch mi ngaw ra fen féri. Ra pwáraatá ar niamam ren ar liwinsefáliti ar fel ngeni Jiowa. Iwe, Jiowa a álisiirsefál.

Jefta a kefilitá me ren ekkewe aramas pwe epwe wisen maun ngeni ekkewe chón Amon mi ngaw. Jefta a fókkun mochen pwe Jiowa epwe álisi lón ewe maun. Ina popun a pwon ngeni Jiowa: ‘Ika ka álisiei le akkufu ekkewe chón Amon, upwe fangóló ngonuk ewe áeménún aramas mi towu seni imwei pwe epwe souniei mwirin ai liwin seni ewe maun.’

Jiowa a aúseling ngeni án Jefta we pwon, iwe a álisi pwe epwe win. Lupwen Jefta a liwiniti imwan we, ka silei ié ewe áeménún aramas mi towu pwe epwe souni? Ina i néún we áláemén fépwúl. Jefta a kétá: ‘Mwa met, nei fépwúl! A ifa me áletipechoun met ei ka fér ngeniei. Nge ua fen eáni eú pwon ngeni Jiowa, iwe usap tongeni atai.’

Lupwen néún Jefta we fépwúl a silei usun án Jefta we pwon, a pwal letipechou me lepoputáán. Pún a wewe ngeni pwe epwe likitaló seman we me chienan kewe. Nge, epwe angang ngeni Jiowa ren lusun manawan lón án Jiowa we imwenfel lón Silo. Ina minne a ereni seman we: ‘Ika pwe ka fen eáni eú pwon ngeni Jiowa, iwe mi lamot óm kopwe apwénúetá.’

Iwe, néún Jefta we fépwúl a feiló Silo, iwe ren lusun manawan a angang ngeni Jiowa lón an we imwenfel. Rúáánú rán iteiten ier, ekkewe fin Israel ra kan feiló chuuri me ra kan pwapwafengen. Ekkewe aramas ra tongei néún Jefta we fépwúl pún i emén néún Jiowa chón angang mi fókkun múrinné.