LESEN 4
A Apwapwaai Seman we me Jiowa
Met Jefta a pwonei ngeni Jiowa?
Néún Jefta we nengngin a féri met seman we a pwonei inaamwo ika a weires
En mi kúna ei nengngin lón ei lios?— Néún ewe mwán itan Jefta. Ewe Paipel ese affata itan, nge sia silei pwe a fen apwapwaai seman we me Jiowa. Sipwe káé usur me seman we Jefta.
Jefta, i emén mwán mi múrinné me a awora watteen fansoun le ákkáiti néún we usun Jiowa. I pwal emén mwán mi péchékkúl me souemmwen mi múrinné. Ina popun chón Israel ra tingorei an epwe emmweniir le maun ngeni ekkewe chón oputer.
Jefta a iótek ren án Kot álillis pwe epwe win. Jefta a pwonei ngeni Jiowa pwe ika a win, iwe epwe ngeni ewe áeménún aramas epwe towu seni imwan we atun a liwin. Eménna epwe nónnóm me angang lón án Kot we imwenfel mangaku lón lusun ránin manawan. Ena imwenfel mangaku, ina ewe leeni aramas ra etto fel ngeni Kot ie me lóóm. Iwe, Jefta a win lón ewe maun! Iwe en mi silei ié we a akkomw towu seni imwan we atun a liwin?—
Ewer, néún Jefta we nengngin! Ina i néún we ákkáláemén, nge iei Jefta epwele tiinaaló. Ena mettóch a fókkun eletipechowu Jefta. Nge chechchemeni pwe a fen féri eú pwon. Mwittir chék, néún we nengngin a ereni: ‘Papa, ka fen pwon ngeni Jiowa, iwe a lamot kopwe féri.’
Iteiten ier, chiechien néún Jefta we, ra ló chuuri
Néún Jefta we a pwal letipechou. Ese tongeni pwúpwúlú me néúnéú lón ewe imwenfel mangaku. Nge a fókkun mochen apwénúetá án seman we pwon me apwapwaai Jiowa. Ina met a fókkun lamot ngeni lap seni an epwe pwúpwúlú are néúnéú. Iwe a likitaló imwan, me a nónnóm lón ewe imwenfel mangaku lón lusun ránin manawan.
Óm ekiek pwe minne néún Jefta we a féri a apwapwaai seman we me Jiowa?— Ewer! Ika ka álleasochisi me tongei Jiowa, kopwe tongeni usun néún Jefta we. Kopwe pwal fókkun apwapwaai semom kewe me inom me Jiowa.
ÁLLEANI LÓN NÉÚMI PAIPEL
Tuteronomi 6:4-6
Soukapwüng 11:30-40a
[Pwóróus fan]
a Lón ewe popun kapasen Ipru, ei wokisin a wewe ngeni pwe néún Jefta we nengngin a nónnóm lón ewe imwenfel mangaku lón lusun ránin manawan me ese pwúpwúlú.