Ewe Mwán Mi Péchékkúl Seni Meinisin

EN MI silei iten ewe mwán mi péchékkúl seni meinisin mi fen manaw wóón fénúfan? Itan Samson, i emén soukapwúng. Jiowa ewe a apéchékkúla Samson. Mwen án Samson epwe uputiw, Jiowa a ereni inan we: ‘Ekiseló chék kopwe néúni emén át. Epwe emén sou emmwen le seláni Israel seni ekkewe chón Filistia.’

Ekkewe chón Filistia, iir aramas mi ngaw mi nónnóm lón Kanaan. A wor chómmóng néúr soufiu, iwe ra wesewesen eriáfféwú ekkewe chón Israel. Lón eú fansoun, lupwen Samson a feffetál ngeni ewe leeni ekkewe chón Filistia ra nónnóm ie, a sereni emén watteen laion mi wérúwér. Nge Samson a nieló ewe laion ren chék péún. A pwal nieló fitepúkú ekkewe chón Filistia mi ngaw.

Mwirin, Samson a sani emén fefin itan Telila. Ekkewe meilapen chón Filistia ra pwonei pwe emén me emén leir epwe ngeni Telila 1,100 féún silifer ika neminnewe epwe ereniir ewe popun Samson a kon péchékkúl. Telila a mochen unusen ewe moni. Esap wesewesen i emén chiechien Samson, esap pwal i emén chón peni néún Kot kewe aramas. Iwe, a chék ekkeisini Samson ika met popun an a kon péchékkúl.

Iwe mwirin, Telila a féri pwe Samson epwe ereni ewe popun an a péchékkúl. Átewe a apasa: ‘Ese mwo fán eú an epwe ffich mékúrei. Seni chék ewe fansoun ai uputiw, Kot a filieitá pwe upwe emén néún chón angang mi imuló lón eú wis, wisen emén Nasir. Ika epwe ffich mékúrei, epwe péút seniei ai péchékkúl.’

Iwe lupwen Telila a silei ei mettóch, a amméúraaló Samson wóón pechen. Iwe, a kéraalong emén mwán pwe epwe fichi mékúran. Lupwen Samson a neló, a fen péút seni an péchékkúl. Iwe, ekkewe chón Filistia ra tolong me liapeni. Ra onusaawu mesan kewe me ra néúni chón angang.

Eú rán, ekkewe chón Filistia ra féri eú pari watte pwe repwe fel ngeni ar we kot Takon, iwe ra átekinawu Samson seni ewe imwen fétek pwe repwe turunufaseei. Nge lón ena atun, mékúren Samson a fen ttamoló. Samson a ereni ewe át mi kamwéch péún le emmweni: ‘Kopwe mut ngeniei ai upwe attapa úrelapen ei imw.’ Mwirin, Samson a iótek ngeni Jiowa pwe epwe apéchékkúla, iwe a kamwéch ekkewe úr. A kétá: ‘Mut ngeniei ai upwe eti ekkeei chón Filistia le máló.’ Mei wor lap seni 3,000 chón Filistia lón ewe pari, iwe lupwen Samson a tiini ekkewe úrelap, ewe imw a turutiw me ra máló meinisin ekkeei aramas mi ngaw.