Jiowa A Efisi án Samison Epwe Péchékkúl

Chómmóng chón Israel ra fel ngeni uluulun sefál, iwe Jiowa a mut ngeni ekkewe chón Filistia ar repwe nemeni fénúer we. Nge a chúen wor ekkóch chón Israel ra tongei Jiowa. Emén me leir itan Manoa. I me pwúlúwan we ese wor néúr. Eú rán Jiowa a tiinaato emén chónláng ren pwúlúwen Manoa we. Ena chónláng a ereni: ‘Kopwe néúni emén át. Epwe amanawa chón Israel seni ekkewe chón Filistia. I epwe emén Nasir.’ Ka silei ié kena Nasir? Iir néún Jiowa chón angang mi fókkun aúchea. Ekkewe Nasir ese mwumwu ngeniir ar repwe fichi mékúrer.

Mwirin och fansoun, néún Manoa we át a uputiw, iwe a eita ngeni Samison. Lupwen Samison a wattetá, Jiowa a efisi an epwe fókkun péchékkúl. A tongeni nieló emén laion ren chék péún. Lón pwal eú atun, Samison a ákkáláemén le nieló 30 chón Filistia. Ekkewe chón Filistia ra oputa i me ra kan kúkkútta alen ar repwe nieló. Lón eú pwinin atun Samison a annut lón Kasa, ra feiló ren ttitin ewe telinimw me ra witiwit ikena pwe repwe nieló lesossorun ewe rán. Nge lukenipwin, Samison a pwáátá me a feiló ngeni ttitin ewe telinimw me úttatá asamen ewe ttit, me mwáreló wóón ungen eú chuuk kkan ngeni Hepron!

Mwirin, ekkewe chón Filistia ra feiló ren néún Samison we kammwet itan Telila, me ra erá: ‘Áúpwe ngonuk fitengéréú féún moni silifer iká kopwe kútta met popun a kon watte án Samison péchékkúl. Áúa mochen liapeni me oturaalong lón kalapus.’ Iwe, Telila a mochen ewe moni, ina popun a tipeeú ngeni. Akkomw, Samison ese mochen pwáár ngeni pwata a fókkun péchékkúl. Nge neminna a chék sópweeló le echchimwa tori an a pwáár ngeni. Samison a ereni: ‘Esap mwo fán eú án mékúrei epwe fich pokiten ngang emén Nasir. Iká a fich mékúrei, iwe epwe turu seniei ái péchékkúl.’ Samison a fókkun mwáálliló ren an ereni ena, iká met?

Mwittir chék Telila a ereni ekkewe chón Filistia: ‘Úa silei met a efisi an péchékkúl.’ A annutaaló Samison wóón pechen me mwirin a ereni emén an epwe fichi mékúran. Telila a púchér le erá: ‘Samison, ekkewe chón Filistia ra war!’ Samison a pwáátá nge an péchékkúl a turu seni. Ekkewe chón Filistia ra turufi, olusaawu mesan, me ra oturaalong lón kalapus.

Mwirin ena, a poputá ttamsefál mékúren Samison. Lón eú atun fitengéréú chón Filistia ra kochufengen lón imwenfelin ar we kot Takon, me ra púchér le erá: ‘Ach we kot a ngenikich Samison! Oupwe atowu Samison, sipwe urumwotei.’ Ra aúetá lefilen ekkewe ruuofóch úúr me ra ámángawa. Samison a kékké me erá: ‘Jiowa kese mochen fang ngenieisefál péchékkúl.’ A tiini ekkewe ruuofóch úren ewe imwenfel ren unusen an péchékkúl. Iwe, unusen ewe imw a turutiw me nieló meinisin ekkewe aramas lón ewe imwenfel, kapachelong Samison.