Kot A Filatá Tafit

EN MI kúna met ei a fis? Ei alúwél a seláni ei kúkkún siip seni ei pear. Ei pear a feito, iwe a uwealó ewe kúkkún siip pwe epwe ocheei. Nge ewe alúwél a chei, iwe a nieló ewe pear nge ewe kúkkún siip a manaw. Lón pwal eú fansoun a seláni emén lein ekkewe siip seni emén laion. Esap pwe i emén alúwél mi pwora? En mi silei ié ei?

Iei i ewe alúwél Tafit. A nónnóm lón ewe telinimw Petleem. Seman we itan Jesi néún Opet, nge Opet néún Rut me Poas. En mi chechchemeniir? Tafit a kan wisen túmúnú néún seman kewe siip. Tafit a uputiw 10 ier mwirin án Jiowa filatá Saul pwe epwe king.

A tori ewe fansoun lupwen Jiowa a apasa ngeni Samuel: ‘Angei och ewe kepit mi kkóló aúchean, iwe feiló ngeni imwen Jesi we lón Petleem. Ua fen filatá emén me lein néún kewe át pwe epwe king.’ Lupwen Samuel a kúna néún Jesi we mwánichi itan Eliap, a apasa lón letipan: ‘Wesewesen iei i ewe emén Jiowa a fen filatá.’ Nge Jiowa a ereni: ‘Kosap nengeni úkúkún ttaman me átéchún. Use filatá pwe epwe king.’

Iwe Jesi a kérato néún we át itan Apinatap, iwe a emwenaato ren Samuel. Nge Samuel a apasa: ‘Aapw, Jiowa ese pwal fili.’ Mwirin, Jesi a emwenaato néún we át itan Sama. Samuel a apasa: ‘Jiowa ese pwal filatá i.’ Jesi a emwenaato ren Samuel néún kewe fúmén át, nge Jiowa ese fili emén me leir. Samuel a eis: ‘Ikkeei iir meinisin noum kewe át?’

Jesi a apasa: ‘Ewe setúpútúr ese mwo nóm. Nge iwe i lúkún, a kan túmúnú ekkewe siip.’ Lupwen ra atolonga Tafit, Samuel a kúna pwe i emén mi átéch. Jiowa a apasa: ‘Iei i ewe emén. Kele ninatiw ewe kepit wóón.’ Iwe, ina ewe mettóch Samuel a féri. Ewe fansoun epwe feito lupwen Tafit epwe wiliti kingen Israel.