Tafit me Koliat

Jiowa a ereni Samuel: ‘Kopwe feiló ren imwen Jesi we. Emén me lein néún kena át epwe wiliiti kingen Israel mwirin.’ Iwe Samuel a feiló ren imwen Jesi we. Atun a kúna néún Jesi we mwánichi, a ekieki: ‘Eli iei ewe alúwél Jiowa a filaatá.’ Nge Jiowa a ereni Samuel pwe esap ina i ewe a filaatá. Jiowa a erá: ‘Úa nennengeni letipen aramas, nge úse chék nennengeni napanaper me lúkún.’

Jesi a pwal uweato wonomén néún át ren Samuel. Nge Samuel a erá: ‘Jiowa ese pwal filiir. Mi pwal wor ekkóch noum át?’ Jesi a erá: ‘Mi wor emén sáingo, nei kúkkúnúlóón, itan Tafit. Nge ese nóm pwe e túmúnú nei kewe siip.’ Atun Tafit a war, Jiowa a ereni Samuel: ‘Ina i ewe úa filaatá!’ Samuel a ninatiw ewe lé wóón mékúren Tafit pwe epwe wiliiti kingen Israel mwirin Saul.

Mwirin och fansoun, a fis eú maun lefilen chón Israel me ekkewe chón Filistia, me a wor emén néúr soufiu mi mwánemmong itan Koliat a fiu fán iter. Iteiten rán, Koliat a kan ákkámángawa ekkewe chón Israel. A púchér ngeniir me erá: ‘Tiinaato emén epwe fiu ngeniei. Iká epwe win, áúpwe néúmi slave. Nge iká úpwe win, oupwe wiliiti néúm slave.’

Tafit a feiló ren leenien ekkewe soufiun Israel fán mwéngé pwe enen pwiin kewe iir soufiu. A rong Koliat me a erá: ‘Ngang úpwe fiu ngeni!’ King Saul a erá: ‘Nge ka chúen emén kúkkún.’ Tafit a pélúweni: ‘Jiowa epwe álisiei.’

Saul a ngeni Tafit úfan we úféúfen maun, nge Tafit a erá: ‘Úse tongeni fiu lón ei úf.’ Tafit a angei néún we éúlún iwe a feiló ren ewe chénúpupu. A filaatá nimeféú faw mi mwotoutou me a waalong lón an we pwotou. Iwe mwirin Tafit a ssá ngeni Koliat, nge Koliat a púchér me erá: ‘Enan kúkkún át, feito ikeei. Úpwe ngeni ekkan machchang me ekkewe manmwacho inisum pwe repwe ocheei.’ Tafit ese niwokkus. A pwal púchér ngeni me erá: ‘Ka feito fán noum ketilas me siles, nge ngang úa feito lón iten Jiowa. Kese fiu ngenikem, nge ka fiu ngeni Kot. Meinisin ikeei repwe silei pwe Jiowa a péchékkúl lap seni efóch ketilas me siles. Epwe atolongakemi meinisin lepéúm.’

Tafit a waalong eféú faw lón néún we éúlúl me a nouti ren unusen an péchékkúl. Ren álillisin Jiowa, ewe faw a kokolóng lón eten mesen Koliat. Ena mwánemmong a turuló lón ewe pwúl me a máló. Mwirin ekkewe chón Filistia ra sú. Ka lúkúlúk wóón Jiowa ussun Tafit?