PWÓRÓUS 58
Tafit Me Koliat
EKKEWE chón Filistia ra pwal feito pwe repwe maunsefál ngeni Israel. Pwiin Tafit kewe úlúmén watte ra chóni án Saul we mwichen soufiu. Iwe eú rán Jesi a ereni Tafit: ‘Waló ekkewe féún iráán wit me fóchun pilawa ren pwiom kewe me ppii ika ifa usur.’
Lupwen Tafit a tori ewe leenien soufiu, a ssá ngeni ewe leenien maun pwe epwe ppii pwiin kewe. Ewe re Filistia mi mwánemmong itan Koliat a pwerewu pwe epwe ámángawa ekkewe chón Israel. Ina met a kan féri iteiten lesossor me lekuniol ren úkúkún 40 rán. A kétá: ‘Ou filatá emén lein chienemi kewe pwe epwe fiu ngeniei. Ika a win me nieiló, iwe, oupwe néúnikem chón angang. Nge ika ua win me nieló, iwe, aupwe néúnikemi chón angang. Iei ua isetiw mwemi eú okkuf pwe oupwe filatá emén pwe epwe fiu ngeniei.’
Tafit a eisini ekkóch ekkewe soufiu: ‘Met liffangen emén ika epwe nieló ei re Filistia me angasaaló Israel seni ei minen ássáw?’
Emén me lein ekkewe soufiu a apasa: ‘Saul epwe liffang ngeni ewe mwán chómmóng pisek aúchea. Epwe pwal liffang ngeni pwisin néún we fépwúl pwe epwe pwúlúweni.’
Nge meinisin ekkewe chón Israel ra niwokkusiti Koliat pún a wesewesen mwánemmong. A ttam seni 9 fiit, iwe pwal emén soufiu a kan wisen uwei an we ttitin maun.
Ekkóch soufiu ra ló ereni King Saul pwe Tafit a mochen fiu ngeni Koliat. Nge Saul a ereni Tafit: ‘Kosap tongeni fiu ngeni ei re Filistia. En chék emén alúwél, nge i emén soufiu lón unusen manawan.’ Tafit a pélúweni: ‘Ua fen nieló emén pear me emén laion mi uwealó néún semei kewe siip. Iwe, ei re Filistia epwe chék usur. Jiowa epwe álisiei.’ Iwe Saul a apasa: ‘Iwe kele feiló, amwo Jiowa epwe nónnóm reom.’
Tafit a pweretiw ren eú chénúpupu me angei nimeféú faú mi mwotoutou, iwe a waalong lón an we pwotou. Mwirin a ló chuuri ewe mwánemmong. Lupwen Koliat a kúna, ese tongeni lúkúlúk ren met a kúna. A ekieki pwe epwe fókkun mecheres an epwe nieló Tafit.
Koliat a apasa: ‘Kele chék pwereto rei me upwe amwéngé ngeni ekkewe machchang me man inisum.’ Nge Tafit a apasa: ‘En ka pwereto fán efóch ketilas me ruuofóch wokun nikáppich, nge ngang ua etto fán iten Jiowa. Ikenái Jiowa epwe akkufuk lepeei, iwe upwe niukóló.’
Mwirin an apasa ena, Tafit a ssáiti Koliat. A angei eféú faú seni an we pwotou, waalong lón néún we minen eppich, iwe a eppichi ngeni Koliat ren unusen an péchékkúl. Ewe faú a ssá wenewen ngeni chamwen Koliat, iwe a turuló me a máló! Ekkewe chón Filistia ra sú lupwen ra kúna pwe a máló néúr we nampa eú. Ekkewe chón Israel ra cheer, iwe ra akkufuur.
1 Samuel 17:1-54.