Tafit Ese Niwokkus

Met ka kan féri atun ka niwokkus?— Neman ka feiló ren inom kewe me semom pwe repwe álisuk. Nge a pwal wor emén a tongeni álisuk. A manaman lap seni meinisin. En mi silei ika ié ena?— Ewer, ina i Jiowa Kot. Iwe iei, sipwe pwóróus usun emén alúwél lón Paipel itan Tafit. A silei pwe Jiowa epwe álisi iteitan, ina popun ese niwokkus.

Seni leménúkolun Tafit, seman kewe me inan ra áiti ngeni an epwe tongei Jiowa. Ena mettóch a álisi Tafit an esap niwokkus inaamwo ika a wor met mi eniwokkus a fis ngeni. A silei pwe Jiowa, Chiechian we, iwe I epwe álisi. Eú rán, lupwen Tafit a túmúnú ekkóch siip, emén laion mi watte a pwereto me ineii emén ekkewe siip! En mi silei met Tafit a féri? A chei ewe laion me nieló ren péún! Mwirin, atun emén pear epwele ocheei emén ekkewe siip, Tafit a pwal nieló! Óm ekiek, ié a álisi Tafit?— Ewer, Jiowa.

A pwal wor eú atun a kkóló án Tafit pwora. Ekkewe chón Israel ra mammaun ngeni ekkewe aramas, iir chón Filistia. Emén me lein ekkewe soufiun Filistia, a fókkun langatattam, emén mi mwánemmong! Itan Koliat. Ena mwán mi mwánemmong a turunufasa ekkewe soufiun Israel pwal Jiowa. Koliat a ereni ekkewe soufiun Israel ar repwe etto me fiu ngeni. Nge meinisin ekkewe chón Israel ra fókkun niwokkus le fiu ngeni. Nge atun Tafit a rongorong ena, a ereni Koliat: ‘Upwe fiu ngonuk! Jiowa epwe álisiei me upwe akkufuk!’ Óm ekiek nge Tafit mi pwora?— Ewer, a fókkun pwora. En mi mochen silei met a fis mwirin?

Tafit a angei néún we minen eppich me nifféú faú mi mwotoutou, iwe a ló fiu ngeni ewe mwán mi mwánemmong. Atun Koliat a kúna pwe Tafit emén chék át, a ámángawa. Nge Tafit a ereni: ‘En ka pwereto rei fán efóch ketilas nge ngang ua etto reom fán iten Jiowa.’ Mwirin, a waalong eféú faú lón néún we minen eppich, iwe a ssá ngeni Koliat me áwenewenaaló an nikáppichi ngeni. Ewe faú a kkúú chamwen Koliat! Ena mwán mi mwánemmong a turuló me máló! Ekkewe chón Filistia ra niw, iwe iir meinisin ra sú. Ifa usun ewe át Tafit a tongeni akkufu emén mi mwánemmong?— Jiowa a álisi, me Jiowa a fókkun manaman lap seni ewe mwán mi mwánemmong!

Met ka tongeni káé seni pwóróusen Tafit?— Jiowa a kon manaman lap seni meinisin. Me i Chiechiom. Iwe ika kopwe niwokkus, kopwe chemeni pwe Jiowa a tongeni álisuk pwe kopwe pwora!