Osukosuk Lón Imwen Tafit We

MWIRIN án Tafit poputá le nemenem lón Jerusalem, Jiowa a álisi an we mwichen soufiu le akkufu chómmóng chón oputer. Jiowa a fen pwon pwe epwe liffang ngeni ekkewe chón Israel ewe fénú Kanaan. Iwe iei ren án Jiowa álillis, ra fénúeni meinisin ekkewe fénú a pwon ngeniir.

Tafit emén sou nemenem mi múrinné. A tongei Jiowa. Ina popun iei eú me lein ekkewe mettóch a akkomw féri, a uweató án Jiowa we pworofel mwirin an we liapeni Jerusalem. Iwe, a pwal mochen an epwe aúetá eú imwenfel pwe epwe anómu ewe pwoor lón.

Lupwen Tafit a ierin mwán, a féri eú mettóch mi ngaw. Tafit a silei pwe mi ngaw an epwe angeimwááli och mettóch esap an. Nge lón eú kuniolun lupwen a nóm wóón osun imwan we, a netiw me kúna emén fefin mi fókkun liéch. Itan Patsipa, nge pwúlúwan we itan Uria, i emén néún Tafit soufiu.

A kon watte án Tafit sani Patsipa, pwe iwe a kérato ngeni imwan we. Nge pwúlúwen Patsipa we a fiti eú maun. Iwe Tafit a méúr ren Patsipa, mwirin neminna a pwopwo. Tafit a fókkun lólilen, iwe a tiinaaló pwóróus ngeni Joap néún we meilapen soufiu pwe epwe anómu Uria me mwen ewe maun pwe epwe máló. Lupwen Uria a máló Tafit a pwúlúweni Patsipa.

Jiowa a fókkun song ren Tafit. Ina minne, a tiinaaló néún we chón angang Natan pwe epwe ereni usun an kewe tipis. En mi tongeni kúna Natan me ikeei ie an a fóffós ngeni Tafit. Tafit a fókkun niamam ren minne a fen féri, iwe ina popun Jiowa ese nieló. Nge Jiowa a apasa: ‘Pokiten ka féri ekkeei mettóch mi ngaw, epwe chék wokkor chómmóng osukosuk lein chón leimwom.’ A ifa me lélléén ewe osukosuk mi tori Tafit!

Akkomw, néún Patsipa we át a máló. Mwirin, néún Tafit we mwánichi Amnon a kirikiringaw ngeni fefinan we itan Tamar. Ei mettóch a efisi watteen án néún Tafit we mwán Apsalom song pwe iwe a nieló Amnon. Mwirin, Apsalom a liapeni letipen chómmóng ekkewe aramas, iwe a pwisin seikaatá ngeni ewe wis king. Iwe mwirin Tafit a akkufu Apsalom lón maun, nge Apsalom a máló. Pwúngún a tori Tafit chómmóng osukosuk.

Atun an a fiffis ekkena osukosuk, Patsipa a néúnatiw emén át itan Salomon. Lupwen Tafit a chinnap me semmwen, néún we mwán Atonia a sótun seikaatá pwisin i ngeni ewe wis king. Lupwen an a fis ena mettóch, Tafit a ereni emén souasor itan Satok pwe epwe epiti ngeni mékúren Salomon ewe kepit pwe epwe pwáraatá pwe Salomon epwe king. Ekiseló mwirin, Tafit a máló lón an 70 ierin. A nemenem úkúkún 40 ier, iwe iei Salomon a kingen Israel.