Án King Tafit Tipis

Atun Saul a máló, Tafit a wiliiti king. A 30 ierin. Mwirin an a king ren fitu ier, lón eú pwinin atun a nóm asen imwan we imwen king, a kúna emén fefin mi liéch. Tafit a kerán silei pwe itan Patsipa me pwúlúwan emén soufiu itan Uraia. Tafit a tiiti Patsipa an epwe etto ren imwan we imwen king. Ra lisowumwáál, iwe Patsipa a pwopwo. Tafit a sótun opaaló met ewe a féri. A ereni néún we meilapen soufiu an epwe onómu Uraia mwen ewe maun me mwirin likitaaló. Mwirin án Uraia ninniiló lón maun, Tafit a pwúlúweni Patsipa.

Nge Jiowa a kúna meinisin ekkewe mettóch mi ngaw ra fiffis. Met a féri? Jiowa a tiinaaló ewe soufós Natan ren Tafit. Natan a erá: ‘Emén mwán mi pisekisek a wor chómmóng néún siip, me emén mwán mi wéúngaw a chék wor emén néún kúkkúnún siip, nge a fókkun tongei. Ewe mwán mi pisekisek a angei seni ewe mi wéúngaw néún we emén chék kúkkúnún siip.’ Tafit a song me a erá: ‘A fen éch án ena mwán mi pisekisek epwe máló!’ Mwirin Natan a ereni Tafit: ‘Fen en ena mwán mi pisekisek!’ Tafit a fókkun mengiringir, me a erá: ‘Úa tipis ngeni Jiowa.’ An tipis a atoto chómmóng osukosuk wóón i me an we famili. Jiowa a apwúngú Tafit, nge a mut ngeni an epwe manaw pokiten a wenechar me tipetekison.

Tafit a mochen aúetá eú imwenfel fán iten Jiowa, nge Jiowa a filaatá néún we itan Salomon an epwe aúetá ewe imwenfel. Tafit a poputá le ammólnatá pisekin ewe imwenfel fán iten Salomon me erá: ‘Án Jiowa we imwenfel epwe fókkun ling. Salomon a chúen emén kúkkún, nge úpwe álisi le ammólnatá pisekin ewe imwenfel fán itan.’ Tafit a fang watteen néún moni fán iten ewe angangen kaú. A kúnékún chón angang mi angangéch. A ionifengeni kolt me silifer, me a uweato ekkewe irá itan setar seni Tair me Siton. Atun a arap an epwele much manawen Tafit, a ereni Salomon ussun kókkótun kaúún ewe imwenfel. A erá: ‘Jiowa a ereniei ái úpwe makkeetiw ekkeei mettóch fán itom. Jiowa epwe álisuk. Kosap niwokkus. Kopwe tipepwora me féri ewe angang.’