Salomon, Ewe King Mi Tipachem

SALOMON a alúwél atun a wiliti king. A tongei Jiowa, iwe a apwénúetá ewe fén mi múrinné seman we Tafit a áiti ngeni. Jiowa a pwapwa ren Salomon, iwe lón eú pwin a ereni ei mettóch lón eú ttan: ‘Salomon, met ka mochen upwe ngonuk?’

Salomon a pélúweni: ‘Jiowa ai Kot, ngang emén chék alúwél, use silei ifa usun ai upwe nemenem. Ina minne kopwe ngeniei tipachem, pwe upwe tongeni nemeni noum kewe aramas fán pwúng.’

Jiowa a pwapwa ren án Salomon we tingor. Ina pwata Jiowa a apasa: ‘Pokiten ka fen tingor tipachem, nge esap manawattam are pisek, iwe upwe ngonuk tipachem lap seni tipachemen meinisin mi fen manaw. Nge upwe pwal ngonuk minne kese tingor, weween wéúéch me ling.’

Mwirin, rúúemén fefin ra feito ren Salomon fán iten eú osukosuk watte. Emén leir a apasa: ‘Ám me neminnei aua nónnómfengen lón eú chék imw. Ua néúnatiw emén át, iwe mwirin, neminnei a pwal néúnatiw emén át. Iwe lón eú pwinin néún we a máló. Nge atun ua annut, a watiw únúkki néún we mi má, iwe a angei nei we. Lupwen ua neló ua nengeni ewe ménúkol mi má, nge ua kúna pwe esap nei we.’

Lupwen a rong ena, ewe emén fefin a apasa: ‘Aapw! Ewe mi manaw, nei, nge ewe mi má, néún!’ Ewe emén a pélúweni: ‘Aapw! Ewe mi má, noum, nge ewe mi manaw, nei!’ A iei usun ar ra áninifengen. Met Salomon epwele féri?

A tiiti efóch ketilas me lupwen ra wato, a apasa: ‘Pékúfesenni ena ménúkol mi manaw, iwe ineti ngeni neminkeei.’

Wesewesen inan we a kétá: ‘Aapw! Kese mochen kosap nieló ena ménúkol. Ngeni chék neminnei!’ Nge ewe emén a apasa: ‘Kosap ngenikem, kele chék pékúfesenni.’

Iwe Salomon a apasa: ‘Kosap nieló ena ménúkol! Ngeni ewe áeménún fefin. Ina i wesewesen inan.’ Salomon a silei ei mettóch pún ewe wesewesen néún ewe ménúkol a kon watte an tongei ewe ménúkol pwe iwe a tipeeú ngeni an epwe fang ngeni ewe emén fefin pwe esap máló. Lupwen ekkewe aramas ra rong usun napanapen án Salomon pwákini ena osukosuk, ra pwapwa pokiten néúr we king mi tipachem.

Atun Salomon a nemenem, Kot a efeiéchú ekkewe aramas ren an achómmónga uwaan ewe fénú ren kreip, fik, wit, parli me pwal ekkóch sókkun mwéngé. Ekkewe aramas ra úféúf úf mi múrinné me nóm lón imw mi múrinné. A lululó ekkewe mettóch mi múrinné mi nóm ren ekkewe aramas.