Salomon A Aúetá Ewe Imwenfel

ME MWEN Tafit epwele máló, a ngeni Salomon liosun kaútáán án Jiowa we imwenfel, nge ena lios a feito seni Kot. Lón arúáánún ierin án Salomon nemenem, a poputá le aútáái ewe imwenfel, iwe a wes lón úkúkún fisu esopw ier. Fite, fite ngeréú aramas ra angang wóón ewe imwenfel. A mémmong an kaútá pún a watte ar áeá kolt me silifer.

A wor ruu ruumw mi aúchea lón ewe imwenfel, usun chék ekkewe lón ewe imwenfel mangaku. Nge ekkena ruumw ra watte seni ekkewe lón ewe imw mangaku wóón fán ruu. Salomon a isenalong ewe pworofel lón ewe ruumw kúkkúlong lón ewe imwenfel.

Lupwen a wes ewe imwenfel, a fis eú watteen apwapwa. Salomon a fótopwúkútiw me mwen ewe imwenfel, iwe a iótek, usun ka kúna me lón ei lios. Salomon a apasa ngeni Jiowa: ‘Unusen láng mwo, nge kese kuchulong lón, iwe itá epwe ifa usun óm kopwe kuchulong lón ei imwenfel. Nge ai we Kot, kese mochen aúseling ngeni noum kewe aramas lupwen ra kuliiti ei leeni lón ar iótek.’

Lupwen Salomon a áwesaaló an iótek, ekkei a feitiw seni láng. A kenaló ekkewe asorun man ekkewe aramas ra fen féri. Iwe, eú saram mi ttinéch a ttin lón unusen ewe imwenfel. Ei mettóch a pwáraatá pwe Jiowa a aúseling, iwe a pwapwa ren ewe imwenfel me án Salomon we iótek. Iwe iei, ewe imwenfel a wiliti ewe leeni aramas repwe feito ngeni ren ar repwe fel, nge esap chúen ewe imwenfel mangaku.

Salomon a nemenem fán tipachem fansoun langattam, iwe ekkewe aramas ra pwapwa. Nge Salomon a pwúlúweni chómmóng fefin seni fénúen ekis, nge esap iir chón fel ngeni Jiowa. En mi tongeni kúna emén me leir an na fel ngeni ena ululun? Iwe mwirin, pwúlúwen Salomon kewe ra etipetipa an epwe pwal fel ngeni ekkewe ekkóch kot. Ka silei met a fis lupwen Salomon a féri ei mettóch? Ese chúen kirekiréch ngeni ekkewe aramas. A wiliti emén mi kirikiringaw, iwe ekkewe aramas rese chúen pwapwa.

Pokiten ei, Jiowa a song ren Salomon, iwe a ereni: ‘Upwe angei sonuk mwúúm we, iwe upwe ngeni pwal emén mwán. Ei mettóch esap fis atun ka manaw, nge epwe fis atun noum we epwe nemenemen. Nge usap angei aramas meinisin lón mwúúm we seni noum we.’ Sipwe ppii ifa usun an a fis ei mettóch.