Iir Rese Chapetiw

EN MI chechchemeni ika ka fen rongorong usun ekkeei úlúmén alúwél? Iir chienen Taniel kewe rese mochen mwéngé minne ese échitiir. Ekkewe chón Papilon ra eita ngeniir Satrak, Mesak me Apetneko. Nge nengeniir mwo iei. Pwata rese chapetiw ngeni ei watteen lios usun chék met ekkeei aramas ra féri? Sipwe ppii.

En mi chechchemeni ekkewe Allúk Engol Jiowa a pwisin makker? Iei ewe áeúin allúk: ‘Ámi ousap fel ngeni emén kot lúkún ngang.’ Ekkeei alúwél ra álleasochisi ei allúk inaamwo ika esap ina eú mettóch mi mecheres ar repwe féri.

Nepukatnesar ewe kingen Papilon, a kérato chómmóng aramas mi wis tekia ar repwe asamolu ei lios a fen aúetá. A kerán chék wes le ereni ekkewe aramas: ‘Ika oua rong ttikin ekkewe rappwa me ekkewe minen nikáttik, oupwe chapetiw me fel ngeni ei lios mi ffér seni kolt. Ié ese chapetiw me fel ngeni epwe mwittir kóturulong lón eú leenien kek mi fókkun pwich.’

Lupwen Nepukatnesar a silei pwe Satrak, Mesak me Apetneko rese chapetiw, a fókkun song. A tiinaaló ekkóch mwán pwe repwe átekiniireto ren. A pwal ereniir sefál ar repwe chapetiw. Nge ekkewe alúwél ra ápilúkúlúkú Jiowa. Ra ereni Nepukatnesar: ‘Ám we Kot, ewe ám aua angang ngeni, a tongeni selánikem. Nge ikaamwo esap selánikem, ám ausap chapetiw ngeni noum we lios mi ffér seni kolt.’

Lupwen Nepukatnesar a rong ei mettóch, a lapóló an song. A wor eú leenien kek mi kkanoto. Iwe a apasa: ‘Oupwe epwichatá ewe leenien kek pwe pwichikkaran epwe lapóló wóón fán fisu!’ Iwe a erá pwe ekkewe mwán mi péchékkúl seni meinisin lón an we mwichen soufiu repwe féti Satrak, Mesak me Apetneko me otururelong lón ewe leenien kek. A kon pwichikkar ewe leenien kek pwe iwe ekkewe mwán péchékkúl ra máló ren ngetengetan. Nge met a fis ngeni ekkewe úlúmén alúwél ra otururelong?

Ewe king a nelóng lón ewe leenien kek, iwe a fókkun niwokkus. A eis: ‘Esap pwe úlúmén ekkewe alúwél sia fétiir me otururelong lón ewe leenien kek mi fókkun pwich?’

Néún kewe chón angang ra pélúweni: ‘Ewer, mi pwúng.’

A apasa: ‘Nge ua kúna fémén mwán mi feffetál lón ewe ekkei. Rese féfé me rese kkar ren ewe ekkei. Iwe, ewe aféménún a usun emén chónláng.’ Ewe king a kine ngeni asamen ewe leenien kek me kékké: ‘Satrak! Mesak! Apetneko! Ou towu, ámi kana chón angang ngeni ewe Kot mi Fókkun Tekia!’

Lupwen ra towu, meinisin ra kúner pwe rese mwo nge feiengaw. Iwe ewe king a apasa: ‘Amwo ewe Koten Satrak, Mesak me Apetneko epwe lingeló! A tiinatiw néún we chónláng, iwe a selániir pokiten ar rese chapetiw me fel ngeni emén kot lúkún pwisin ar we.’

Esap iei eú leenien áppirú usun án aramas tuppwél ngeni Jiowa sipwe áppirú?