Rese Chapetiw

Mwirin och fansoun án King Nepukatnesar ttana ewe uluulun aramas, a pwisin féraatá eú watteen uluulun mi ffér seni kolt. A onómu lón ewe masiesin Tura me a kérato ekkewe aramas tekia lón ewe leeni, kapachelong Satrak, Mesak, me Apetneko pwe repwe chufengen mwen ena uluulun. Ewe king a allúkú: ‘Atun chék oua rong ttikin ekkewe rappwa, arp, bagpipes och sókkun pisekin nikáttik, oupwe chapetiw ngeni ewe uluulun! Nge iká emén ese chapetiw, epwe kóturulong lón ewe leenien ekkei.’ Itá ekkena úlúmén repwe chapetiw ngeni ewe uluulun are repwe chék fel ngeni Jiowa?

Mwirin ewe king a allúkú pwe repwe ettiki néúr kewe nikáttik. Meinisin ra chapetiw ngeni ewe uluulun me fel ngeni, chilóón chék Satrak, Mesak, me Apetneko. Ekkóch ekkewe mwán ra kúna pwe rese chapetiw, iwe ra ereni ewe king: ‘Ekkena úlúmén re Ipru rese fel ngeni ewe uluulun.’ Nepukatnesar a tiiti iir ar repwe feito me a ereniir: ‘Úpwe mut ngenikemi sefál ámi oupwe fel ngeni ewe uluulun. Nge iká ouse, úpwe oturukemilong lón ewe leenien ekkei. Ese wor emén kot epwe tongeni selánikemi seniei.’ Ra pélúweni: ‘Ám king, áúsapw fókkun chapetiw. Ám we Kot epwe amanawakem, nge ikáámwo esap amanawakem, áúsapw fókkun fel ngeni ewe uluulun.’

Nepukatnesar a fókkun song. A ereni néún kewe chón angang: ‘Oupwe soonisefál ewe ekkei pwe pwichikkaran epwe tori fán fisu seni me mwan!’ Mwirin a allúkú ngeni néún kewe soufiu: ‘Oupwe féétiir, me otururelong!’ Ekkewe soufiu ra mwittir má atun ra kkan ngeni ewe leenien ekkei pokiten a kon pwichikkar. Ekkewe úlúmén re Ipru ra kóturulong lón ewe leenien ekkei. Nge atun Nepukatnesar a nelong lón, a kúna pwe a wor fémén mwán ra feffetál, nge esap chúen úlúmén. A fókkun niwokkus me eisini néún kewe néúwis: ‘Esap pwe sia oturaalong úlúmén mwán lón ewe ekkei? Nge iei úa kúna fémén, nge emén leir a ussun chék emén chónláng!’

Nepukatnesar a kine ngeni ewe leenien ekkei me a kériirewu: ‘Oupwe towu, ámi néún ewe Kot mi Unusen Tekia chón angang!’ Meinisin ra fókkun mwaar atun ra kúna án Satrak, Mesak, me Apetneko towu me lón ewe ekkei nge rese feiengaw. Inisiir, mékúrer, me úfer kewe ese kkar, me rese pwal mwo nge pwonen ekkei.

Nepukatnesar a erá: ‘Án Satrak, Mesak, me Apetneko we Kot a fókkun tekia. A tiinaato néún we chónláng me a amanawer. Ese pwal wor emén Kot epwe ussun ar na Kot.’

Ka úppós le túppwél ngeni Jiowa ese lifilifil met epwe fis ussun chék ekkewe úlúmén re Ipru?