Eú Mwú Epwe Nómoffóch

Lón eú pwinin, King Nepukatnesar a eáni eú ttan mi osukosuka. A fókkun áweiresi iwe ese tongeni méúr. A kérato néún kewe soumagic me a ereniir: ‘Oupwe áweweei ngeniei ái we ttan.’ Iwe ra erá: ‘Ám king, kopwe erenikem met ka ttana.’ Nge Nepukatnesar a ereniir: ‘Aapw! Iká ouse áweweei ngeniei met úa ttana úpwe nikemiló.’ Ra pwal erenisefál: ‘Kopwe erenikem met ka ttana, iwe áúpwe áweweei.’ A ereniir: ‘Ámi meinisin oua chék otupuei. Oupwe ereniei met úa ttana!’ Ra ereni ewe king: ‘Ese wor ién a tongeni féri ena. A weires met ka eáni tingor.’

Pokiten Nepukatnesar a fókkun song, iwe a allúkú pwe meinisin ekkewe soutipáchem repwe niniiló, kapachelong Taniel, Satrak, Mesak, me Apetneko. Taniel a tingorei ewe king an epwe mut ngeni och fansoun pwe epwe tongeni áweweei an we ttan. Mwirin Taniel me chienan kewe ra iótek ngeni Jiowa me tingorei an epwe álisiir. Met Jiowa a féri?

Jiowa a ékúna ngeni Taniel weween án Nepukatnesar we ttan. Sorotáán, Taniel a feiló ren néún ewe king we chón angang me ereni: ‘Kosap nieló ekkewe soutipáchem. Ngang úpwe áweweei án ewe king we ttan.’ Ewe chón angang a panaló Taniel ren Nepukatnesar. Iwe Taniel a ereni ewe king: ‘Kot a pwáári met epwe fis ngonuk lón ekkan rán. Iei masouen óm we ttan: Ka kúna emén watteen uluulun mékúran a ffér seni kolt, péún me leupwan ra ffér seni silifer, lukan me pechen ra ffér seni piras, pwásukun a ffér seni mechá, me apachapachan a ffér seni mechá mi nofit ngeni pwúl. Mwirin eféú faw a turuwu me wóón eú chuuk, me a amékkú pechen ena uluulun. Iwe a tatakkisitiw me parasfetál lón ásepwál. Ewe faw a wiliiti eú watteen chuuk, me a uroló fénúfan ren.’

Mwirin Taniel a erá: ‘Iei weween óm we ttan: Mwuum we ina ewe mékúr mi ffér seni kolt. Ewe silifer ina eú mwú epwe nemenem mwirum. Mwirin epwe pwal wor eú ussun piras, epwe nemeni unusen fénúfan. Nge ewe mwú mwirin epwe péchékkúl ussun chék mechá. Iwe mwirilóón, epwe wor eú mwú mi kinikinfesen, ekkóch kinikin epwe péchékkúl ussun mechá nge ekkóch epwe apwangapwang ussun pwúl. Ewe faw mi wiliiti eú chuuk, ina ewe Mwúún Kot. Epwe ataieló meinisin ekkena mwú me epwe nónnóm tori feilfeiló.’

Nepukatnesar a chapetiw mwen mesen Taniel, me ereni: ‘Óm we Kot a pwáári ngonuk weween ewe ttan. Ese wor emén Kot me lúkún.’ Nepukatnesar ese nieló Taniel nge a fen seikaatá an epwe meilapen meinisin ekkewe soutipáchem me nemeni Papilon. Ka kúna ifa ussun Jiowa a pélúweni án Taniel iótek?