Eú Mwú mi Ussun Efóch Watteen Irá

Lón eú pwinin, Nepukatnesar a eáni eú ttan mi eniwokkus. A kérato néún kewe soutipáchem ar repwe ereni weween an we ttan. Nge esap wor emén a tongeni áweweei weween an na ttan. Mwirin, ewe king a fós ngeni Taniel.

Nepukatnesar a ereni Taniel: ‘Lón ái we ttan, úa kúna efóch irá. Pokiten a mámmááritá me langattam, iwe a tori fán láng. Ka tongeni kúna ena irá ekis meinisin me wóón fénúfan. A ling chéén me a chómmóng uwaan. Ekkewe man ra asésé fán núrún, me ekkewe machchang ra ffér fáser wóón palan kewe. Mwirin emén chónláng a feitiw seni láng. A erá: “Kopwe pékúoló ewe irá, me pékúoló palan kewe. Kopwe likiti popun me waaran kewe lón ewe pwúl, me fééti ngeni mechá me piras. Tipen ena irá epwe siwil seni tipen aramas ngeni tipen man ren úkúúkún fisu ier. Meinisin aramas repwe silei pwe Kot i ewe Sounemenem me a tongeni ngeni ién chék a mochen ngeni ewe mwú.”’

Jiowa a pwáári ngeni Taniel weween ewe ttan. Atun Taniel a weweiti ewe ttan, a fókkun niwokkus. A erá: ‘Ái king, amwo pwe ei ttan epwe weneiti chón oputom kewe, nge a fen weneituk. En ewe watteen irá mi pékúpékútiw. Epwe péút sonuk mwúúm we, me kopwe mwéngé fetil lón ewe masies ussun chék emén man. Nge pokiten ewe chónláng a erá pwe epwe chék nóm ewe popun me waaran, iwe kopwe king sefál.’

Eú ier mwirin, Nepukatnesar a fetál wóón asen imwan we me a ingeiti Papilon. A erá: ‘Nengeni amwararen ei telinimw úa aúetá. A fis ren ái tufich me péchékkúl!’ Atun a chúen fós, eú méngúngú seni láng a erá: ‘Nepukatnesar! Iei epwele péút sonuk mwúúm we.’

Lón ena chék atun, Nepukatnesar a umwesiló me a ussun emén man. Ra asúoló seni imwan we me a nóm lein ekkewe man lón ewe masies. Mékúren Nepukatnesar a ttam ussun únen ikel, me úkkún a ussun úkkún emén machchang.

Mwirin wesilóón ekkewe fisu ier, Nepukatnesar a miritsefál me Jiowa a pwal seikaatá an epwe kingen Papilon. Mwirin Nepukatnesar a erá: ‘Úa mwareiti Jiowa, ewe Kingen láng. Iei úa silei pwe Jiowa i ewe Sounemenem. A átekisonatiw aramas mi lamalamtekia, me a tongeni ngeni ién chék a mochen ngeni ewe mwú.’