Ekkewe Mesen Mak Wóón Ewe Etiip

MET a fis ikeei ei? Ekkeei aramas ra féri eú watteen pari. Ewe kingen Papilon a fen kérato engeréú aramas mi wis tekia pwe néún waséla. Ra áeá ekkewe kap mi ffér seni kolt me silifer me ekkewe sepi ra angei seni án Jiowa we imwenfel lón Jerusalem. Nge mwittir chék, a pwá aútún péún emén mwán me a poputá le makkeei wóón ewe etiip. Ekkewe aramas meinisin ra niwokkus.

Néún néún Nepukatnesar we itan Pelsasar, i ewe king iei. A kékké pwe repwe tiiti néún kewe chón angang mwán mi tipachem. Ewe king a apasa: ‘Ié e tongeni álleani ei mak me ereniei weween, epwe angei chómmóng liffang me wiseni ewe wis nampa úlúngát fán ewe king lón ewe mwú.’ Nge ese wor emén lein ekkewe mwán tipachem mi tongeni álleani ekkewe mesen mak wóón ewe etiip me rese pwal tongeni apasa weween.

Inen ewe king we a rong ewe akúrang, iwe a tolong lón ewe watteen ruumwen mwéngé. A ereni ewe king: ‘Kese mochen kosap kon niwokkus. Mi wor emén mwán lón mwuum we mi silei ekkewe kot mi fel. Lupwen Nepukatnesar semen semom we a king, a ewisa ngeni ena mwán pwe epwe meilapen meinisin néún kewe chón angang mwán mi tipachem. Itan we Taniel. Kopwe tiiti i me epwe erenuk met weween ekkena mettóch meinisin.’

Iwe ra mwittir atolonga Taniel. Mwirin án Taniel erá pwe esap angei ekkewe liffang, a poputá le ereni ewe popun án Jiowa atowu Nepukatnesar, semen semen Pelsasar we, seni ewe wis king fán eú me lóóm. Taniel a apasa: ‘A fókkun lamalam tekia. Iwe Jiowa a apwúngú.’

Taniel a ereni Pelsasar: ‘Ka silei meinisin minne a fis ngeni Nepukatnesar, nge ka chúen chék lamalam tekia usun i. Ka fen angei ekkewe kap me sepi seni án Jiowa we imwenfel me ka fen áeá. Ka mwareiti ekkewe kot mi ffér seni irá me faú, nge kese fen asamolu ach we Chón Fératá mi Lapalap. Ina popun Kot a tiinaato ewe paw pwe epwe makkeei ekkeei kapas.’

Taniel a apasa: ‘Iei ewe mettóch mi mak: ‘MEʹNE, MEʹNE, TEʹKEL me PARʹSIN.’

‘MEʹNE a wewe ngeni pwe Kot a fen aúkú ránin mwuum we me a fen asopwaló. TEʹKEL a wewe ngeni pwe ka fen kilo, nge a pwáló pwe kese éch. PARʹSIN a wewe ngeni pwe mwuum we epwe kkuf ren ekkewe chón Metia me Persia.’

Lón ewe chék atun Taniel a kakkapas, ekkewe chón Metia me Persia ra poputá le maunei Papilon. Ra liapeni ewe telinimw me nieló Pelsasar. Ekkewe mesen mak wóón ewe etiip ra pwénúetá lón chék ena pwinin! Nge met epwe fis ngeni ekkewe chón Israel iei? Sipwele kúna, nge sipwe akkomw ppii met epwe fis ngeni Taniel.