Ewe Mak Wóón ewe Etiip

Mwirin och fansoun Pelsasar a wiliiti kingen Papilon. Lón eú pwinin, a etiwa fitengéréú aramas tekia lón ewe leeni ngeni eú kametip. A ereni néún kewe chón angang ar repwe uwawu ekkewe kap mi ffér seni kolt ekkewe Nepukatnesar a angei me lón án Jiowa we imwenfel. Pelsasar me néún kewe waséla ra ún seni ekkena kap me ra mwareiti ar kewe kot. Mwittir chék, a pwá efóch paw me a poputá le makkeei ekkóch kapas mi alóllóól weween wóón ewe etiip lón ewe leenien mwéngé.

Pelsasar a fókkun niwokkus. A kérato néún kewe soumagic me pwon ngeniir: ‘Iká emén epwe áweweei ekkeei kapas, úpwe seikaatá epwe nampa úlúngát le nemenem lón Papilon.’ Ra achocho le áweweei nge esap wor emén a tongeni áweweei weween ekkewe kapas. Mwirin ewe kiwin a tolong me erá: ‘Mi wor emén mwán itan Taniel a kan soun áweweei mettóch ngeni Nepukatnesar. A tongeni áweweei ekkeei kapas ngonuk.’

Taniel a feito ren ewe king. Iwe Pelsasar a ereni: ‘Iká ka tongeni álleani me áweweei ekkeei kapas, úpwe fang ngonuk epa mwárámwár kolt me seikuketá kopwe wiseni eú wis tekia me nampa úlúngát le nemenem lón Papilon.’ Taniel a erá: ‘Úse mochen angei ekkena liffang, nge úpwe chék erenuk met weween ekkeei kapas. Semom we Nepukatnesar a lamalamtekia, nge Jiowa a etekisonatiw. Ka fen silei meinisin met a fis ngeni, nge ka ésúfélúngawa Jiowa ren óm ún wain seni an kewe kap mi ffér seni kolt mi feito seni an we imwenfel. Ina popun Kot a makkeei ekkeei kapas: Mene, Mene, Tekel, me Parsin. Ekkena kapas ra wewe ngeni pwe ekkewe chón Metia me ekkewe chón Persia repwe okkufu Papilon, iwe kosap chúen king.’

Ussun itá ese wor emén a tongeni okkufu Papilon. A mmen túmún ren tittin kewe mi péchékkúl me eú chénúpupu mi alóllóól. Nge lón na pwinin, chón Metia me Persia ra mauner. Ewe kingen Persia itan Sirus a erikaló ewe chénúpupu pwe ekkewe soufiu repwe tongeni pwerelong lón. Atun ra tori asamen ewe ttit, a suuk! Iwe ra tolong, okkufu chón ena telinimw, me nieló ewe king. Mwirin, Sirus a wisen sounemenemen Papilon.

Esaamwo tori eú ier, nge Sirus a ereni ekkewe aramas: ‘Jiowa a ereniei pwe úpwe aúsefálietá imwan we imwenfel lón Jerusalem. Ién chék me lein néún kewe aramas a mochen álillis, a tongeni feiló.’ Chómmóng chón Jus ra liwiniti imwer 70 ier mwirin talóón Jerusalem, ussun chék met Jiowa a pwonei. Sirus a eliwinisefáli ekkewe kap mi ffér seni kolt me silifer me meinisin ekkewe mettóch Nepukatnesar a angei seni ewe imwenfel. Ka kúna ifa ussun Jiowa a néúnéú Sirus le álisi néún kewe aramas?