Néún Kot Kewe Aramas Ra Ló Seni Papilon

IEI, a fen órun ruu ier mwirin ewe fansoun án Papilon eoló ren ekkewe chón Metia me Persia. Iwe, nengeni met a fis iei! Ekkewe chón Israel ra ló seni Papilon. Pwata ra tongeni ngaseló? Ién a angasereló?

Ewe kingen Persia itan Sirus, a angasereló. Fansoun langattam mwen án Sirus uputiw, Jiowa a ewisa ngeni néún we soufós itan Aisea an epwe makkeei usun Sirus: ‘En kopwe féri minne chék ua mochen óm kopwe féri. Ekkewe asam resap kapúngúló pwe kopwe tongeni liapeni ewe telinimw.’ Iwe Sirus a wisen sou emmwen lón ar akkufu Papilon. Ekkewe chón Metia me Persia ra tolong lón ewe telinimw lepwin lón ekkewe asam rese kapúngúló.

Nge néún Jiowa we soufós Aisea a pwal apasa pwe Sirus epwe apwúngaló ewe allúk pwe Jerusalem me an we imwenfel epwe fférsefál. Nge mi pwúng pwe Sirus a féri ei allúk? Ewer a féri. Iei ewe mettóch Sirus a ereni ekkewe chón Israel: ‘Iei, ou feiló Jerusalem me oupwe aútáái án ámi we Kot Jiowa we imwenfel.’ Iwe, ekkeei chón Israel repwe feiló fán iten ar repwe féri ei chék mettóch.

Nge esap meinisin ekkewe chón Israel lón Papilon repwe tongeni fiti ei sái mi ttam tori Jerusalem. A fókkun ttam pún úkúkún rúáánú maram, iwe chómmóng ra kon chinnap are semmwen nge ese pwák ngeniir towauen ewe sái. Iwe, mi pwal wor ekkóch popun án ekkewe ekkóch rese ló. Nge Sirus a ereni ekkewe rese ló: ‘Ou ngeni chókkewe repwe aúetá Jerusalem me ewe imwenfel ekkewe silifer me kolt me pwal ekkóch liffang.’

Iwe chómmóng liffang ekkeei chón Israel repwele ló Jerusalem ra angei. Pwal eú, Sirus a ngeniir ekkewe sepi me kap King Nepukatnesar a angei seni án Jiowa we imwenfel atun an we atai Jerusalem. A chómmóng osen ekkeei aramas.

Mwirin órun rúáánú maram lón ar sái, ekkewe chón Israel ra tori Jerusalem, nge ra war lón ewe chék fansoun mi kaúkúló me mwan. A kerán 70 ier mwirin talóón ewe telinimw, iwe ese fókkun chúen wor aramas lón ewe fénú. Inaamwo ika ekkewe chón Israel ra nómsefál lón wesetáán fénúer, nge epwe pwal wor ekkóch fansoun repwe nóm lón weires, usun met sipwele káé iei.