Jesus A Uputiw Lón Eú Imwen Man

EN MI silei ika ié ei kúkkún ménúkol? Ewer, iei i Jesus. A kerán uputiw lón eú imwen man. Maria epwele akónaaló Jesus lón ewe leenien amwéngéén man, iei ewe leeni ra kan waalong enen ekkewe tongki me ekkewe ekkóch man lón pwe repwe mwéngé. Nge pwata Maria me Josef ra nónnóm ikeei ie ren ekkeei man? Esap iei eú leeni itá emén ménúkol epwe uputiw lón, ika met?

Ewer. Nge iei ewe popun ra nónnóm ikeei ie: Ewe sou nemenemen Rom itan, Sisar Aukustus a féri eú allúk pwe aramas meinisin repwe liwiniti ewe telinimw ra uputiw lón pwe repwe makkeei iter lón eú puk. Iwe Josef a uputiw ikeei ie lón Petleem. Nge lupwen iir me Maria ra war, ese wor eú ruumw lón ewe telinimw ra tongeni nónnóm lón. Iwe, ra etto ikeei ie ren ekkeei man. Iwe lón chék ei rán, Maria a néúnatiw Jesus! Nge i mi péchékkúl usun met ka kúna.

Ka tongeni kúna ekkeei chón masen siip ar ra feffeito pwe repwe ppii Jesus? Ra fen nónnóm lein ekkewe masies lepwin pwe repwe túmúnú néúr kewe siip, iwe eú saram mi saramaram a asarama únúkúr. Saramen emén chónláng! Ekkewe chón masen siip ra fókkun niwokkus. Nge ewe chónláng a apasa: ‘Ousap niwokkus! Ua uwei kapas allim ngenikemi. Ikenái, Kraist ewe Samol a uputiw lón Petleem. I epwe amanawa ekkewe aramas! Oupwe kúna an a túkútúk lón mangaku me kókkóón lón eú leenien amwéngéén man.’ Chómmóng chónláng ra mwittir feito, iwe ra poputá le mwareiti Kot. Iwe ekkewe chón masen siip ra mwittiriló pwe repwe kútta Jesus, iwe iei ra kúna.

En mi silei ika pwata a kkóló aúchean Jesus? En mi silei ika i wesewesen ié? Chechchemeni pwe lón sópwun eú lón ei puk sia pwóróus usun Néún Kot we mwánichi. Jiowa me Néún na ra angangfengen le féri láng me fénúfan me mettóch meinisin. Iwe ina pwóróusen Jesus!

Jiowa a féri manawen Néún we seni láng pwe epwe waalong lón luken Maria. Mwittir chék, emén ménúkol a poputá le mámmáár lón luken neminnewe, usun chék án ekkewe ménúkol mámmáár lón luken iner kewe. Nge ei ménúkol i Néún Kot. Iwe mwirin, Jesus a uputiw ikeei ie lón ei imwen man lón Petleem. En mi weweiti met popun ekkewe chónláng ra fókkun pwapwa le esilei ngeni aramas pwe Jesus a fen uputiw?