Ekkewe Chónláng Ra Esilei án Jises Uputiw

Ewe sounemenemen Mwúún Rom, itan Sisar Akostos, a atowu eú allúk ngeni meinisin chón Jus ar repwe liwiniti fénúer pwe repwe makkeei iter. Ina minne Josef me Meri ra sái ngeni Petleem, pwúkútáán fénúen án Josef we famili. Nge a arapakkan án Meri epwele néúnéú.

Atun ra wareiti Petleem, ese wor eú leeni ra tongeni nóm ie me lúkún chék ewe leenien man. Meri a néúnatiw néún we Jises ikena ie. A finitaaló lón eché róóró me a akkoona lón ewe leenien ammwéngéén man.

A wor ekkóch chón mmasen siip ra nóm lemal kkan ngeni Petleem me mmasa néúr kewe siip lepwin. Mwittir chék, emén chónláng a útá mwen meser me lingen Jiowa a asarama únúkkúr. Ekkena chón mmasen siip ra fókkun niwokkus, nge ewe chónláng a apasa: ‘Ousap niwokkus. Úpwe erenikemi eú pwóróus mi apwapwa. Ikenái, ewe Messaia a uputiw lón Petleem.’ Lón ena chék atun, chómmóng chónláng ra pwá me fán láng me apasa: ‘Mwareiti Kot lón láng, me kinamwe wóón fénúfan.’ Iwe, ekkena chónláng ra móróló. Nge met ekkewe chón mmasen siip ra féri?

Ra eráfengen lefiler: ‘Ousaaló Petleem.’ Iwe, ra mwittir feiló, nge ra kúna Josef me Meri me néúr we ménúkol lón ewe leenien man.

Meinisin ra mwaar ren ar rong met ewe chónláng a ereni ekkewe chón mmasen siip. Meri a fókkun ekieki alon ewe chónláng me ese fókkun ménúk seni. Ekkewe chón mmasen siip ra liwiniti néúr kewe siip me ra kilisou ngeni Jiowa ren meinisin met ra kúna me rong.