Johannes A Papataisi Jesus

NENGENI ena machchang itan dove a chachangetiw wóón mékúren ena mwán. Ina i ewe mwán, Jesus. A órun 30 ierin iei. Iwe ena mwán mi nóm ren, ina i Johannes. Sia fen ekis káé usun Johannes. En mi chechchemeni ewe fansoun Maria a feiló chuuri márárin we Elisapet nge ewe ménúkol lón luken Elisapet a mwékútúkút ren pwapwa? Ena ménúkol lón lukan, i Johannes. Nge met ei Johannes me Jesus ra féri?

Johannes a kerán wes le otuetiw Jesus lón ei chénúpupu Jortan. A iei usun án emén papatais. Akkomw, emén epwe otuetiw fán ewe konik, iwe mwirin epwe otuetá. Pokiten ina ewe mettóch Johannes a kan féfféri ngeni aramas, iwe ina popun a iteni Johannes Papatais. Nge pwata Johannes a papataisi Jesus?

Johannes a papataisi pún Jesus a feito ren me tingorei Johannes pwe epwe papataisi. Johannes a kan papataisi ekkewe aramas mi mochen pwáraatá pwe ra aier seni ekkewe mettóch mi ngaw ra fen féri. Nge itá Jesus a féri mettóch mi ngaw pwe epwe aier seni? Aapw, ese mwo fán eú án Jesus epwe ina usun, pún pwisin i Néún Kot we seni láng. Nge an tingorei Johannes an epwe papataisi, a sókkóló weween. Sipwe ppii ika ifa weween.

Me mwen án Jesus etto ren Johannes ikeei ie, i emén chón táikú. Emén chón táikú, a kan ffér pisek seni irá, áwewe chék ren ekkewe cheepel, sea me ekkewe leenien mót mi ttam. Josef, pwúlúwen Maria we i emén chón táikú, iwe a pwal áiti Jesus ena sókkun angang. Nge Jiowa ese tiinatiw Néún we ngeni fénúfan pwe epwe chón táikú. A wor eú angang mi aúchea a ewisa ngeni an epwe féri me a fen tori ewe fansoun án Jesus epwele féri. Iwe, Jesus a tingorei Johannes pwe epwe papataisi pwe epwe pwáraatá pwe epwele féri letipen Seman we. Itá Kot a pwapwa ren ei mettóch?

Ewer, a pwapwa pún mwirin án Jesus tuutá seni ewe konik, eú méngúngú seni láng a apasa: ‘Iei i Nei Át, ewe ua pwapwa ren.’ Pwal eú, usun itá nge láng a suukuló, iwe ei dove a feitiw wóón Jesus. Esap wesewesen emén dove nge usun chék napanapan. Wesewesen ina án Kot we manaman mi fel.

Iwe iei a wor chómmóng mettóch Jesus epwe ekieki usur, ina popun a feiló ngeni eú fénúpéén me nónnóm úkúkún 40 rán. Satan a chuuri me ikkena ie. Satan a sótun le etipetipa Jesus fán úlúngát pwe epwe féri och mettóch mi ú ngeni án Kot kewe allúk. Nge Jesus ese féri.

Mwirin ena, Jesus a liwinsefál me a chuuri ekkóch mwán mi akkomw le wiliti néún chón áppirú are chón káé. Ikkeei iten ekkóch me leir, Andru, Petrus (a pwal iteni Simon), Filip me Nataniel (a pwal iteni Partolomeus). Jesus me ekkeei mineféén chón káé ra fetáleló ngeni ewe leeni itan Kalili. Ra kaúló lón wesetáán telinimwen Nataniel we itan Kana lón Kalili. Me ikkena ie Jesus a fiti eú apwapwaan apwúpwúlú mi watte me a féri an we áeúin manaman. En mi silei ika met ena? A ewili ewe konik ngeni wain.