Jises A Wiliiti ewe Messaia

Jon a kan soun afalafala ei: ‘Emén mi lap seniei epwe feito.’ Atun ina epwele 30 ierin Jises, a feito seni Kalili me feiló ngeni ewe Chénúpupu Jortan, ikewe Jon a papataisi aramas ie. Jises a mochen pwe Jon epwe papataisi, nge Jon a ereni: ‘Itá úsapw fen wisen papataiseek, nge kopwe fen papataisiei.’ Jises a ereni Jon: ‘Jiowa a mochen kopwe papataisiei.’ Iwe ra feilong lón ewe Chénúpupu Jortan, iwe Jon a otuetiw unusen inisin Jises lón ewe konik.

Mwirin án Jises tuutá seni ewe konik, a iótek. Lón ena chék atun, láng a suukuló, me án Kot we ngún mi fel a feitiw wóón ussun emén lisom. Mwirin Jiowa a fósetiw me láng: “Iei i nei Át ewe mi áchengicheng, ewe úa pwapwa ren.”

Atun án Jiowa we ngún mi fel a feitiw wóón Jises, a wiliiti ewe Kraist iká Messaia. Iwe iei epwele poputááni ewe angang Jiowa a tiinaato ngeni fénúfan an epwe féri.

Mwirin chék án Jises papatais, a feiló lón ewe fénúpéén me a nóm ikena ren úkúúkún 40 rán. Atun a liwin, a feiló chuuri Jon. Atun Jises a pwereto ren, Jon a erá: ‘Iei ewe Lamen Kot, ewe epwe uwealó tipisin fénúfan.’ Atun Jon a apasa ena, a áiti ngeni ekkewe aramas pwe Jises i ewe Messaia. Ka silei met a fis ngeni Jises atun a nóm lón ewe fénúpéén? Sipwe ppii.