Jon A Ammólnatá ewe Al

Jon, néún Sekaraia me Elisapet, a wiliiti emén soufós atun a watte. Jiowa a néúnéú Jon le asukula aramas pwe ewe Messaia epwe war. Jon a afalafala ekkewe aramas lón ewe fénúpéén nge esap lón ekkewe sinakok are telinimw. Aramas ra feito seni Jerusalem me lón unusen Jutia pwe repwe káé seni Jon. A áiti ngeniir pwe iká ra mochen apwapwaai Kot, iwe a lamot ar repwe úkútiw le féri met mi ngaw. Mwirin ar aúseling ngeni Jon, chómmóng ra áier seni ar kewe tipis, me Jon a papataisiir lón ewe Chénúpupu Jortan.

A mecheres nónnómun manawen Jon. A úféúf úf seni únen kamel me a mwéngé nifichifichimas me chénún pulech seni lein petewel are honey. Aramas ra mochen silei ussun Jon. Pwal mwo nge ekkewe Farisi me Satusi mi lamalamtekia ra feito ren. Jon a ereniir: ‘A lamot oupwe ekkesiwili ámi féffér me áier. Ousap ekieki pwe oua aúchea pokiten oua erá pwe ámi néún Eperiam. Nge esap itá weween pwe ámi néún Kot.’

Chómmóng ra feito ren Jon me eisini: ‘Met a lamot áúpwe féri pwe áúpwe apwapwaai Kot?’ Jon a ereni ekkewe chón Jus: ‘Iká a wor rúúaché úfom, kopwe ngeni ewe emén mi osupwang eché.’ En mi silei pwata a erá ena? Pwe a mochen néún kewe chón káé repwe silei pwe iká repwe apwapwaai Kot, a lamot repwe tongei aramas.

Jon a ereni ekkewe chón ioni takises ei: ‘Oupwe wenechar me ousap chúri ngeni aramas.’ A ereni ekkewe soufiu: ‘Ousap etiwa liffangen emichimich me ousap kapas chofona.’

Ekkewe souasor me ekkewe chón Lifai ra pwal etto ren Jon me eisini: ‘En Ié? Meinisin ra mochen silei.’ Jon a erá: ‘Ngang ewe emén méngúngúún mi kékkéwu me lón ewe fénúpéén mi emmweni aramas ngeni Jiowa, ussun chék met Aisea a oesini.’

Aramas ra sani met Jon a asukula ngeniir. Ekkóch ra ekieki iká Jon i ewe Messaia. Nge a ereniir: ‘Mi wor emén epwe feito mwiri mi kon lap seniei. Ese mwo nge fich ngeniei áúpwe eppichi féféén ipwan kewe. Úa papataisikemi ren konik, nge i epwe papataisikemi ren ngún mi fel.’