Jesus Lón Ewe Wis King

EKISELÓ chék mwirin án Jesus we apéchékkúla ekkewe rúúemén chón mwelele mi chun, a feito ngeni eú kúkkún sóópw mi kkan ngeni Jerusalem. A ereni rúúemén me lein néún kewe chón káé: ‘Oupwe tolong lón ewe sóópw, iwe oupwe kúna emén kúkkún tongki. Oupwe epichaaló me panato rei.’

Lupwen ra panato ren Jesus ewe tongki, a mótetá wóón. Iwe a sáiló Jerusalem, nge an sái ese kon pwal ttam. Lupwen a arap ngeni ena telinimw, eú pwiin aramas ra towu pwe repwe souni. Arapakkan iir meinisin ra pwiliti úfer kewe sekit me ra eneni ngeni ewe al. Pwal ekkóch ra pékúetiw palen ewe iráán palm me eneni ngeni ewe al, iwe ra kétá: ‘Amwo Jiowa epwe efeiéchú ewe king mi feito lón iten Jiowa!’

Ekkewe mineféén king lón Israel me lóóm, ra kan tolong lón Jerusalem nge ra wawa ekkewe appanen tongki pwe repwe pwári pwisin iir ngeni ekkewe aramas. Iwe ina ewe mettóch Jesus a pwal féri. Iwe, ekkeei aramas ra pwáraatá pwe ra mochen pwe Jesus epwe néúr king. Nge esap aramas meinisin ra mochen an epwe king. Sia tongeni kúna ei mettóch me ren minne a fis lupwen Jesus a feiló ngeni ewe imwenfel.

Lón ewe imwenfel, Jesus a apéchékkúlatá ekkewe aramas mi chun, pechemá me péúmá. Lupwen ekkewe kúkkún semirit ra kúna ei mettóch, ra mwareiti Jesus fán léúwommóng. Nge ei mettóch a asonga ekkewe souasor, iwe ra ereni Jesus: ‘En mi rongorong met ekkewe semirit ra apasa?’

Jesus a pélúweni: ‘Ewer, ngang mi rongorong. Ousaamwo álleani lón ewe Paipel, ikewe ie a apasa: “Seni lón awen ekkewe kúkkún semirit Kot epwe atowu kapasen mwareiti?”’ Iwe, ekkewe semirit ra sópweló le mwareiti néún Kot we king.

Sia mochen ach sipwe usun ekkewe semirit, ika met? Eli ekkóch aramas repwe sótun pinekich seni ach kakkapas usun ewe mwúún Kot. Nge sipwe chék sópweló le ereni aramas usun ekkewe mettóch mi amwarar Jesus epwe féri fán iten aramas.

Lupwen Jesus a nónnóm wóón fénúfan, esap ina ewe atun an a poputá le nemenem lón ewe wis king. Nge ineet atun? Néún Jesus kewe chón káé ra mochen silei. Sipwe álleani usun ei mettóch lón en sópwun mwirin.