PWÓRÓUS 42
Emén Tongki A Kapas
KA FEN rong fán eú án emén tongki kapas? Eli kopwe apasa: ‘Aapw. Ekkewe man rese tongeni kapas.’ Nge ewe Paipel a apwóróusa usun án emén tongki kapas. Sipwe ppii ika ifa usun a fis.
Arapakkan án ekkewe chón Israel repwele tolong lón ewe fénú Kanaan. Palak, ewe kingen Moap, a niwokkusiti ekkewe chón Israel. Iwe, a tiiti emén mwán mi tipachem solá itan Palam pwe epwe etto anúmamaúwa ekkewe chón Israel. Palak a pwon pwe epwe ngeni Palam watteen moni, ina popun Palam a tétá wóón néún we tongki, iwe a poputááni an sái le ló chuuri Palak.
Jiowa ese mochen Palam epwe anúmamaúwa Néún kewe aramas. Ina minne, a tiinaaló emén chónláng fán efóch ketilas mi ttam pwe epwe útá wóón ewe al me eppeti Palam. Palam ese tongeni kúna ewe chónláng, nge néún we tongki a kúna. Ina minne ewe tongki a resin riki seni ewe chónláng, iwe mwirin, a chék koonetiw wóón ewe al. Palam a fókkun song, iwe, a awata ngeni néún we tongki wokun we.
Iwe, Jiowa a afósa néún Palam na tongki pwe Palam epwe rong. Ewe tongki a eis: ‘Itá met u féri, iei ka awataei?’
Palam a apasa: ‘Ka fen urumwoteiei. Ika e wor nei ketilas upwe fen niukóló!’
Ewe tongki a eis: ‘Itá ua fen iei usun ngonuk fán eú?’
Palam a pélúweni: ‘Aapw.’
Iwe, Jiowa a suuki mesen Palam kewe pwe epwe kúna ewe chónláng mi úkkúútá wóón ewe al fán ketilas. Ewe chónláng a apasa: ‘Pwata ka awata noum na tongki? Ua etto pwe upwe eppetuk, pún ese pwúng óm na sái pwe kopwe anúmamaúwa Israel. Ika pwe noum na tongki ese riki seniei, upwe fen niukóló, nge sanne upwe fen ni noum na tongki.’
Palam a apasa: ‘Ua fen tipis. Use silei pwe ka úkkúútá wóón ewe al.’ Ewe chónláng a mut ngeni Palam an epwe sópweei an sái, iwe Palam a ló chuuri Palak. A chúen sótun anúmamaúwa Israel, nge Jiowa a sorei an kewe kapasen anúmamaú ngeni kapasen feiéch fán iten Israel fán úlúngát.
Numperis 21:21-35; 22:1-40; 23:1-30; 24:1-25.