Néún Palam we Aas A Fós

Ekkewe chón Israel ra fen nónnóm lón ewe fénúpéén arapakkan 40 ier. Ra fen okkufu chómmóng telinimw mi péchékkúl. Iwe iei, atun ra nónnóm lón imwer kewe tento lón ewe masiesin Moap éétiwen ewe Chénúpupu Jortan, a tori fansoun ar repwe tolong lón ewe Fénúen Pwon. Ewe kingen Moap itan Palak a niwokkus iká repwe angei seni fénúan we. Iwe, a etiwa emén mwán itan Palam an epwe feito Moap me anúmamawa ekkewe chón Israel.

Nge Jiowa a ereni Palam: ‘Kosap fókkun anúmamawa ekkewe chón Israel.’ Iwe, Palam ese feiló. King Palak a etiwasefáli me pwon ngeni pwe epwe ngeni met chék a mochen, nge Palam ese mochen feiló. Mwirin Kot a apasa: ‘Kopwele feiló, nge kopwe chék apasa met úa erenuk.’

Palam a tétá wóón waan we aas are donkey me feiló Moap, ewe mi nóm éér. A ekiekin an epwe anúmamawa ekkewe chón Israel inaamwo iká Jiowa a fen ereni an esap. Néún Jiowa we chónláng a pwá me wóón ewe al fán úlúngát. Palam ese tongeni kúna ena chónláng, nge néún we aas a kúna. Lón ewe áeúin atun ewe chónláng a pwá, ewe aas a riki ngeni lepekin ewe al. Lón ewe oruuen atun a pwal pwá, ewe aas a riki ngeni ewe ttitin faw me a apachchacha pechen Palam. Lón ewe aúlúngátin atun, ewe aas a chék fótopwúkútiw lukanapen ewe al. Iteitan ekkena atun, Palam a chék opuni ren efóch wok.

Mwirin aúlúngátin án Palam opuni ewe aas, Jiowa a efisi án ena aas epwe fós. Ena aas a eisini Palam: ‘Pwata ka chék awataei?’ Palam a apasa: ‘Ka turunufasaei. Iká e chék wor nei ketilas, úpwe nikoló.’ Ena aas a erá: ‘Ka wáániei ren fite ier. Úa fen piin féri ngonuk ei sókkun me akkomw?’

Mwirin Jiowa a mut ngeni Palam an epwe kúna ewe chónláng. Ewe chónláng a apasa: ‘Jiowa a fen erenuk pwe kosap anúmamawa ekkewe chón Israel.’ Palam a apasa: ‘Úa féri met mi mwáál. Úpwe liwinsefáliti imwei.’ Nge ewe chónláng a ereni: ‘Ka tongeni feiló Moap, nge kopwe chék apasa met Jiowa a erenuk.’

Itá Palam a káé seni met a féri? Aapw. Mwirin ena, Palam a sótun le anúmamawa ekkewe chón Israel fán úlúngát, nge iteiten an féri ena, Jiowa a fen féri an epwe efeiéchúúr. Ló, ló, ló, ekkewe chón Israel ra okkufu Moap, me Palam a niniiló. Esap itá epwe fen éch án Palam epwe aúseling ngeni Jiowa me lepoputáán?