Lón Eú Ruumw Asan

RUU rán mwirin, iei a tori pwinin Arúánú. Jesus me néún kewe engol me rúúemén aposel ra chuto lón ei watteen ruumw asan pwe repwe mwéngé ewe mwéngéén Pasofer. Ena mwán ka kúna an a towu, ina i Jutas Iskariot. Epwele feiló ereni ekkewe souasor ifa usun ar repwe tongeni liapeni Jesus.

Jutas a feiló rer eú rán me mwen ei atun me a eis: ‘Met oupwe ngeniei ika upwe álisikemi le liapeni Jesus?’ Ra apasa: ‘Ilik féún moni silifer.’ Iwe iei, Jutas epwele feiló chuuri ekkewe mwán pwe epwe tongeni emmweniir ngeni Jesus. Esap pwe ina eú mettóch mi fókkun ngaw?

A wes ewe mwéngéén Pasofer. Nge iei Jesus a poputááni pwal eú mwéngé mi aúchea. A eitieló ngeni néún kewe aposel efóch fóchun pilawa, iwe a apasa: ‘Oupwe mwéngé, pún ei a wewe ngeni inisi, ewe upwe fangóló fán itemi.’ Mwirin, a eiti ngeniir eú kapen wain me a apasa: ‘Oupwe ún seni, pún ei a wewe ngeni chchaai, ewe epwe niniló fán itemi.’ Ewe Paipel a eita ngeni ei mettóch ‘ewe mwéngéén fááfen ewe Samol,’ are ‘fááfen ewe Samol.’

Ekkewe chón Israel ra mwéngé ewe Pasofer pwe epwe áchema ngeniir usun ewe fansoun néún Kot we chónláng a passini imwer kewe lón Isip, nge a nieló ekkewe mwennau lón imwen ekkewe chón Isip. Nge iei Jesus a mochen néún kewe chón áppirú repwe chechchemeni i me ifa usun an a fangóló manawan fán iter. Iwe, ina ewe popun an a ereniir pwe repwe féri ei mwéngé mi aúchea iteiten ier.

Mwirin ar we ra mwéngé ewe Mwéngéén Fááfen ewe Samol, Jesus a ereni néún kewe aposel pwe repwe pwora me péchékkúl lón pekin lúkú. Lesópwólóón, ra kél ngeni Kot me ra feiló. A fen pwin iei, neman a fen lukenipwin. Sipwe ppii ia repwele feiló ie.