Án Jises Sáingo Mwéngé me Ekkewe Aposel

Ekkewe chón Jus ra féri ewe Pasofer iteiten ier lón ewe Nisan 14. Epwe áchchema ngeniir ifa ussun Jiowa a angasereló seni ar fétek lón Isip me uweiireló lón ewe Fénúen Pwon. Lón ewe ier 33, Jises me néún kewe aposel ra féri ewe Pasofer lón eú ruumw asan lón Jerusalem. Atun ra pwii le mwéngé, Jises a erá: ‘Emén me leimi epwe afangemáei.’ Ekkewe aposel ra máirú, me ra eisini Jises: ‘Epwe ié?’ A ereniir: ‘Ewe mwán úpwe ngeni ei pilawa.’ Mwirin a ngeni Jutas Iskariot och pilawa. Mwittir chék, Jutas a útá me towu seni ewe ruumw.

Mwirin Jises a iótek, a kinietiw ekkóch pilawa, me a eineti ngeni néún kewe aposel. A ereniir: ‘Oupwe mwéngé ei pilawa. A wewe ngeni inisi, ewe úpwe fangoló fán itemi.’ Mwirin a angei ewe wain me a ióteki iwe a ngeni néún kewe aposel. A ereniir: ‘Oupwe ún ei wain. A wewe ngeni chchaai, ewe úpwe fangoló pwe omusomusen tipis. Úa pwonei ngenikemi pwe oupwe etiei le king lón láng. Oupwe féri ei iteiten ier pwe oupwe chechchemeniei.’ Néún Jises kewe chón káé ra kan chufengen lefááf iteiten ier pwe repwe féri ena mwiich ewe sia kan eita ngeni, Fááfen Ach Samol.

Mwirin ar mwéngéfengen, ekkewe aposel ra áninifengen iká ié me leir a kon lap. Nge Jises a ereniir: ‘Ewe emén mi lap leimi a kisifóchófóch nge ewe mi kis a lap.

‘Ámi chiechiei. Úa erenikemi meinisin met Semei a mochen úpwe erenikemi. Úpwele ló ren Semei lón láng. Nge ámi oupwe chék nónnóm, aramas repwe silei pwe ámi nei chón káé ren ewe tong oua pwáári lefilemi. A lamot oupwe tongfengen ussun ái tongekemi.’

Mwirin, Jises a iótek ngeni Jiowa me a tingorei an epwe túmúnú meinisin néún kewe chón káé. A tingorei an epwe álisiir le angangfengen fán kinamwe. A ióteki pinilóón iten Jiowa. Iwe mwirin, Jises me néún kewe aposel ra kélún mwareiti Jiowa me ra towu lúkún. A akkarap ngeni ewe fansoun án Jises epwele ares.