Jises A Amwéngééni Fitengéréú

Me mwen ewe Pasofer lón ewe ier 32, ekkewe aposel ra liwin seni ar afalafal ngeni chómmóng aramas. Ra pekkus, iwe ra fiti Jises wóón efóch waa ngeni Petsaita, pwe repwe asésé ikena. Nge atun ra arap ngeni órosset, Jises a kúna fitengéréú aramas ra tapweló mwiriir. Inaamwo iká Jises a mochen áláeménúló me néún kewe aposel, nge a chúen etiwaéchú ekkena aramas. A echikara ekkewe mi semmwen me unusen ena rán a asukuler ussun ewe Mwúún Kot. Atun a pwiniló, néún kewe aposel ra pwereló ren me ereni: ‘Repwele echik ekkeei aramas. Kele tiiniireló pwe repwe kút ener pwe repwe mwéngé.’

Jises a ereniir: ‘Ese lamot repwe feiló. Oupwe ngeniir och mwéngé pwe repwe mwéngé ikeei.’ Ekkewe aposel ra eisini: ‘Ka mochen áúpwe feiló kamé ener pilawa?’ Filip, emén me lein ekkewe aposel a erá: ‘Ikáámwo epwe watte néúch moni nge esap naf ach sipwe kamé pilawa fán iten ei mwichen aramas.’

Jises a eis: ‘Ifa úkúúkún anach kena mwéngé?’ Andru a erá: ‘Mi wor nifféú pilawa me rúúemén kúkkún iik. Ese mwo nge naf.’ Jises a ereni: ‘Kopwe wato ekkena pilawa me ekkena iik.’ A ereni ekkewe aramas ar repwe moótiw lón ewe sipa áká 50 me 100 lón eú me eú kúmi. Mwirin Jises a angei ekkewe pilawa me iik, iwe a sachchetá láng o iótek. Mwirin a ngeni ekkewe aposel ewe mwéngé, iwe ra eineti ngeni ekkewe aramas. Ekkewe 5,000 mwán me ekkewe fefin me semirit meinisin ra mwéngé tori ra métúló. Mwirin ena, ekkewe aposel ra ionifengeni ekkewe lusun mwéngé, pwe resap solap. A wor 12 pasikit a uroló! A mmen amwarar ena manaman, iká met?

Ekkewe aramas ra fókkun mwaar ren met Jises a féri, iwe ra mochen seikaatá pwe néúr king. Nge a silei pwe esaamwo tori ewe fansoun mi kefilitá me ren Jiowa an epwe king. Iwe a tiinaaló ewe mwichen aramas me a ereni néún kewe aposel ar repwe feiló pekilóón ewe Setin Kalili. Ra tétá wóón war we, nge Jises a ákkáláemén le feitá wóón ewe chuuk. Pwata? Pokiten a mochen iótek ngeni Seman we. Inaamwo iká a chómmóng met a féri nge a kan awora fansoun iteitan an epwe iótek.