Jises A Fetál Wóón ewe Sáát

A wor án Jises tufich le echikara ekkewe mi semmwen me amanawa ekkewe mi máló nge a pwal tongeni nemeni ásepwál me rán. Mwirin an iótek wóón ewe chuuk, Jises a netiwei ewe Setin Kalili me a kúna ewe mélúmél. Néún kewe aposel ra nóm wóón ewe waa, nge ra weires le fétún ren péchékkúlen ewe ásepwál. Jises a feitiw me a fetál wóón ewe sáát ngeni ewe waa. Atun ekkewe aposel ra kúna án emén fetál wóón ewe sáát, ra niwokkus. Nge Jises a ereniir: ‘Ngang ei. Ousap niwokkus.’

Piter a erá: ‘Samol, iká pwe en ena, kopwe ereniei pwe úpwe feiló reom.’ Jises a ereni Piter: ‘Feito rei.’ Atun a chúen fis ewe mélúmél, Piter a tétiw me wóón ewe waa me a feffetál ngeni Jises wóón ewe sáát. Nge atun a arap ngeni, Piter a nennengeni ewe mélúmél me a niwokkus. A poputá le kokotiw lón ewe sáát. Piter a púchér le erá: ‘Samol, selániei!’ Jises a kamwéchúló péún, me ereni: ‘Pwata ka tipemwárámwár? Ifa óm lúkú?’

Jises me Piter ra tétá wóón ewe waa, me mwittir chék ewe mélúmél a kaúló. Ka tongeni anchangei meefien ekkewe aposel? Ra erá: “En wesewesen Néún Kot.”

Esap chék ina ewe atun Jises a nemeni ewe ásepwál. Pwal lón eú atun, Jises me néún kewe aposel ra sáiló ewe epek nge Jises a annut. Atun a annut, a fis eú watteen mélúmél. Iwe ekkewe lóó ra púngúpúngúri ewe waa, iwe a léllé waar na. Ekkewe aposel ra féngúnatá Jises, me púchér: ‘Sense, sipwele máló! Álisikem!’ Jises a pwáátá me a ereni ewe sáát: “Kopwe mosonosonoló!” Mwittir chék, ewe ásepwál me sáát a masésétiw. Jises a eisini néún kewe aposel: ‘Ifa ámi lúkú?’ Ra eráfengen lefiler: “Pwal mwo nge ewe ásepwál me sáát ra álleasochisi.” Ekkewe aposel ra káé pwe iká ra unusen lúkúlúk wóón Jises, iwe ese wor och mettóch repwe niwokkusiti.