Ar Faletá Wóón Eú Té

NENGENI ei waa a nóm lón osukosuk! A mémmékúkkis! Ka kúna ekkenan aramas mi otururetiw lón enan sáát? Ekkóch ra fen tori lepii. Esap Paulus enan ikenan ie? Sipwe ppii met a fen fis ngeni lón ekkeei fansoun.

Chechchemeni pwe Paulus a kalapus lón Seserea úkúkún ruu ier. Mwirin, ra atétá Paulus pwal ekkóch chón fétek wóón efóch waa, iwe ra poputááni ar sái ngeni Rom. Lupwen ra kkan ngeni ewe fénú Kreta, ra sereni eú mélúmél watte. A kon péchékkúl ewe ásepwál pwe ekkewe mwán rese tongeni kasini ewe waa. Rese pwal tongeni kúna ewe akkar lerán are ekkewe fúú lepwin. Iwe mwirin fitu fitu rán, chón ewe waa rese chúen ápilúkúlúk pwe repwe manaw.

Iwe, Paulus a útá me apasa: ‘Esap wor emén leimi epwe máló, nge ewe waa chék epwe ta. Pún lepwinewe emén néún Kot chónláng a feito rei me apasa: “Kosap niwokkus, Paulus! Kopwe útá mwen mesen Sisar ewe sou nemenemen Rom. Iwe Kot epwe seláni iir meinisin mi fituk le sái.”’

Órun lukenipwin lón ewe engol me rúáánúún rán mwirin an we a poputá ewe mélúmél, ekkewe chón angang wóón ewe waa ra kúna pwe ewe sáát ese chúen alóllóól! Pokiten ra niwokkus pwe ewe waa epwele fal wóón ekkewe faú lón ewe kiroch, ra oturatiw ar kewe angké. Sorotáán ewe soran, ra kúna eú noom. Ra filatá pwe repwe sótun arikalong ewe waa tori an epwe faletá lepii.

Lupwen ra kkan ngeni lepii, ewe waa a fal wóón och pii me a mwochuló. Ekkewe nó ra púngúiti ewe waa me a poputá le mékkúló. Ewe meilapen soufiu me leir a apasa: ‘Ámi meinisin mi sile áá, oupwe akkomw oturukemiitiw leset me áálong lepii. Ámi kana lusun, oupwe oturukemiitiw me mwiriir me oupwe turufi ekkewe irá seni waach ei pwe oupwe wáániir.’ Iwe ina met ra féri. Pokiten ar ra iei usun, meinisin ekkewe rúúepúkú fiik me wonomén chón ewe waa ra tori lepii fán núkúnúkéch, usun minne ewe chónláng a fen pwonei.

Iten ei fénú, Malta. Chón ei fénú ra fókkun kirekiréch me ra túmúnú chón ei waa. Lupwen a échúló ekkewe rán, ra atétá Paulus wóón efóch waa me ra uwealó Rom.