Emén Alúwél Mi Annut

OOO! Met ei a fis? Mi watte feiengawen ei alúwél mi itiló wóón ei pwúl? Nengeni! Inan i Paulus, emén me lein ekkeei mwán mi towu me lón ei imw! En mi pwal tongeni kúna Timoty me ikeei ie? Itá ei alúwél a turutiw seni enan asammwacho?

Ewer, ina ewe mettóch a fen fis. Paulus a eáni eú afalafal ngeni ekkewe chón káé ikeei ie lón Troas. A silei pwe esap chúen kúner ren fansoun langattam pún epwele fiti efóch mwoota sorotáán ewe rán. Iwe, a chék akkafalafal tori lukenipwin.

Iwe ei alúwél itan Oitikus a mómmót wóón ewe asammwacho nge a annut. A turutiw me lón ewe asammwacho me wóón aúlúngátin sássár tori ewe pwúl! Ina minne ka tongeni weweiti ika pwata ekkeei aramas ra meselólilen. Lupwen ekkeei mwán ra ekii ei alúwél, a pwúng met ra ekieki. A máló!

Lupwen Paulus a kúna pwe ewe alúwél a máló, a chappóló wóón me a foropachei. Mwirin a apasa: ‘Ousap lólilen. Ese i feiengaw!’ Iwe a pwúng, ese mwo nge feiengaw! A ina eú manaman! Paulus a amanawasefáli! Unusen ewe pwiin aramas ra fókkun pwapwa.

Iir meinisin ra liwinsefálitá me ra mwéngé. Paulus a sópweló an afalafal tori únúmweirán. Nge ese mwáál Oitikus ese annutsefál! Mwirin Paulus, Timoty me ekkewe mi fitiir lón ar sái ra tétá wóón ewe waa. Ka silei ia repwe ló ie?

Paulus epwele sáingooni an we aúlúngátin sái le afalafal me epwele liwiniti leenian. Lón án Paulus ei sái a nóm úlúngát ier lón ewe telinimw Efisos lón an ákkáláemén. Iwe, a ttam ei sái lap seni an we oruuen sái.

Mwirin ar su seni Troas, ewe waa a ekis kaúló lón Miletus. Pokiten Efisos ese kon pwal towau seni Miletus, iwe Paulus a titiiló ekkewe elter lón ewe mwichefel pwe epwe sáingooni an kapas ngeniir. Mwirin, lupwen a tori ewe fansoun ewe waa epwele su, a ifa me letipechoun ekkewe elter pokiten án Paulus ló seniir!

Iwe ewe waa a liwiniti Seserea. Atun án Paulus nónnóm ikeei ie lón imwen ewe chón káé Filip, ewe soufós Akapus a éúréúra Paulus. A apasa pwe Paulus epwe fétek ika a tori Jerusalem. Iwe a pwúng pún ina ewe mettóch a fis. Iwe mwirin án Paulus nónnóm lón imwen fétek úkúkún ruu ier lón Seserea, ra tiinaaló ngeni Rom pwe epwe kapwúng mwen mesen ewe sou nemenemen Rom itan Sisar. Sipwe ppii met a fis lón an we sái ngeni Rom.