PWÓRÓUS 110
Timoty, Néún Paulus Mineféén Chón Álillis
IEI i ewe alúwél Timoty ka kúna an nóm ren ei aposel Paulus. Timoty a nónnóm ren an we famili lón Listra. Inan we, itan Eunike me inan we chinnap, itan Lois.
Iei ewe aúlúngátin fansoun án Paulus chuuri Listra. Órun eú are lap seni eú ier me lóóm, a ina ewe áeúin fansoun án Paulus me Parnapas sáito ikeei ie pwe repwe afalafal. Iwe iei, Paulus a pwal liwinsefál, iir me chienan we Silas.
Ka silei met ei Paulus a kan ereni Timoty? A eis: ‘En mi mochen fitikem me Silas? Mi lamot óm álillis ngenikem le afalafala aramas lón ekkewe fénú towau.’
Timoty a pélúweni: ‘Ewer, ua mochen feiló.’ Ekiseló mwirin, Timoty a likitaló an we famili me a fitaaló Paulus me Silas. Nge mwen ach sipwe káé usun ar sái, sipwe ppii met a fen fis ngeni Paulus. Iei a fen 17 ier mwirin án Jesus we pwá ngeni me wóón ewe al ngeni Tamaskus.
Chechchemeni pwe Paulus a feiló Tamaskus pwe epwe eriáfféwú néún Jesus kewe chón káé, nge iei a fen pwal emén chón káé! Ekiseló mwirin, ekkóch chón oput Paulus ra ekiekietá ar repwe nieló pún rese sani an afalafal usun Jesus. Nge ekkewe chón káé ra álisi Paulus pwe epwe sú seni ekkewe chón oput. Ra waalong lón eú pasikit me ra ekiietiw lúkún tittin ewe telinimw.
Mwirin, Paulus a feiló Antiokia pwe epwe afalafal. Me ikena ie, ina ewe áeúin fansoun néún Jesus kewe chón áppirú ra iteni Chón Kraist. Mwirin, Paulus me Parnapas ra kúnéló Antiokia pwe repwe sáiló ngeni ekkewe fénú towau le afalafal. Eú me lein ekkewe telinimw ra sái ngeni, ina fénúen Timoty we Listra.
Iwe órun eú ier mwirin, Paulus a liwiniti Listra lón an oruuen sái. Lupwen Timoty a fiti Paulus me Silas, ka silei ia ra feiló ie? Nengeni mwo ei map me sipwe káé usun ekkóch ekkewe leeni.
Ra akkomweiti Ikonium, ewe leeni mi chék kkan. Iwe mwirin, ra feiló ngeni pwal eú telinimw itan Antiokia. Mwirin ra ettá Troas, Filipi, Tesalonika me Perea. Ka kúna Aten wóón ena map? Paulus a afalafal ikena ie. Mwirin ra afalafal úkúkún eú esopw ier lón Korint. Iwe ra ekis kaúló lón Efisos. Iwe, ra liwinsefál wóón efóch mwoota tori Seserea, ettá tori Antiokia, iwe Paulus a nómoló ikena ie.
Iwe, Timoty a sái fite fitepúkú mwail pwe epwe álisi Paulus le afalafala ewe “kapas allim” me poputááni chómmóng mwichefelin Chón Kraist. Ika ka wattetá, kopwe emén néún Kot chón angang mi tuppwél, usun Timoty?