Lamalamen Chón Kraist A Chéúló lón Chómmóng Leeni

Ekkewe aposel ra álleasochisi án Jises we allúk ar repwe achéúfetálei ewe kapas allim wóón unusen fénúfan. Lón ewe ier 47, ekkewe Chón Kraist lón Antiok ra tiinaaló Paul me Parnapas ar repwe afalafal lón sókkopaten leeni. Ekkena rúúemén chón afalafal mi tinikken ra sái lón unusen Eisia Minor, áwewe chék lón ekkewe leeni Terpe, Listra, me Ikonium.

Paul me Parnapas ra afalafal ngeni meinisin, ese lifilifil iká iir mi wéúéch are wéúngaw, iir kúkkún are chinnap. Chómmóng aramas ra etiwa ewe enlet ussun Kraist. Atun Paul me Parnapas ra afalafal ngeni ewe governor seni Saipros itan Serkius Paulus, emén sourong a sótun akaúlóói ar afalafal. Paul a ereni ena sourong: ‘Jiowa a ú ngonuk.’ Mwittir chék, a chuunuló. Atun Governor Paulus a kúna ena, a wiliiti emén chón lúkú.

Paul me Parnapas ra afalafal ekis meinisin, áwewe chék ra afalafal imw me imw, lón leenien amémé, wóón ekkewe al, me lón ekkewe sinakok. Atun ra echikara emén mwán mi pechemá lón Listra, chókkewe mi kúna ena manaman ra ekieki pwe iir kot me ra sótun fel ngeniir. Nge Paul me Parnapas rese mochen repwe féri ena, iwe ra ereniir: ‘Oupwe fel ngeni Kot chék! Ám chék aramas.’ Mwirin, ekkóch chón Jus ra feito me etipetipa ekkewe aramas ar repwe ú ngeni Paul. Ekkena aramas ra manei ngeni Paul faw me oturawu lúkún ewe telinimw, me ra likitaaló pwe epwe máló. Iwe nge, Paul a chúen manaw! Mwittir chék, chienan kewe Chón Kraist ra etto álisi me ra uwealósefál ren ewe telinimw. Mwirin och fansoun, Paul a liwiniti Antiok.

Lón ewe ier 49, Paul a sáisefál. Mwirin an liwin le chuuri pwiin kewe Chón Kraist lón Eisia Minor, a esilefeili ewe kapas allim pwal mwo lón fénú towaw tori Iurop. A feiló Aten, Efisus, Filipai, Tesalonika, me pwal ekkóch leeni. Sailas, Luk, me emén alúwél itan Timoty ra fiti Paul lón an sái. Ra angangfengen le féraatá ekkewe mwichefel me apéchékkúler. Paul a nónnóm Korint úkúúkún eú esopw ier an epwe apéchékkúla ekkewe Chón Kraist. A afalafal, asukul, me mak taropwe ngeni chómmóng mwichefel. A pwal ffér tento. Ekiseló mwirin, Paul a liwiniti Antiok.

Lón ewe ier 52, Paul a sái lón an aúlúngátin sái lón an angangen misineri, nge a akkomw ló Eisia Minor. Iwe, a sái ngeni efeng lón Filipai, mwirin Korint. Paul a nóm fite ier lón Efisus, a asukul, echikara aramas, me álisi ewe mwichefel. A pwal eáni afalafal iteiten rán lón ewe leenien asukul. Chómmóng aramas ra aúseling me ra ekkesiwili féfférúr. Iwe, mwirin án Paul afalafala ewe kapas allim lón chómmóng leeni, a feiló Jerusalem.