Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • bt sópwun 22 p. 197-204
  • “Letipen Jiowa Epwe Fis”

Ese wor video fán iten ei kinikin.

Omusaaló, a wor osukosuk le eppietá ewe video.

  • “Letipen Jiowa Epwe Fis”
  • “Unusen Pwáraatá” Pwóróusen ewe Mwúún Kot
  • Itelap Kisikis
  • Pwal Ekkóch
  • Ra Onuchchang Seni “ewe Fénú Saipros” (Féffér 21:1-3)
  • “Áúa Kútta me Kúna Ekkewe Chón Káé” (Féffér 21:4-9)
  • “Ngang Úa Fen Mmólnetá . . . Ái Úpwe Pwal Máló” (Féffér 21:10-14)
  • “Pwiim Kewe Ra Etiwakem fán Pwapwa” (Féffér 21:15-17)
  • Kopwe Tipepwora Pokiten Jiowa I Óm Souálillis
    Ewe Leenien Mas a Esilefeili án Jiowa We Mwú (Fán Iten ewe Mwichefel)—2020
  • “Esap Tipisi Málóón Emén Aramas”
    “Unusen Pwáraatá” Pwóróusen ewe Mwúún Kot
  • “Unusen Pwáraatá”
    “Unusen Pwáraatá” Pwóróusen ewe Mwúún Kot
  • “Oupwe Aúseling Atun Úpwe Áwewe Ngenikemi Met A Fis”
    “Unusen Pwáraatá” Pwóróusen ewe Mwúún Kot
Pwal Och
“Unusen Pwáraatá” Pwóróusen ewe Mwúún Kot
bt sópwun 22 p. 197-204

SÓPWUN 22

“Letipen Jiowa Epwe Fis”

Paul a tipeppós le féri letipen Kot me feiló ngeni Jerusalem

A lóngólóng wóón Féffér 21:1-17

1-4. Pwata Paul a ló Jerusalem, me met epwele fis ngeni me ikena ie?

ATUN Paul me Luk repwele sái seni Mailitus, iir fengen me ekkewe mwán mi ásimaw lón Efisus ra fókkun weires ren ar repwele kapwongen káimufesen. Ese mecheres ngeni Paul me Luk ar repwe ló seni chókkana ra fókkun tongeer! Ekkena rúúemén misineri ra útá wóón ewe siip. Ar kewe pwotou a masou ren ekkewe mettóch mi lamot ngeniir lón ar we sái. Ra pwal uwei ewe moni ra ionifengeni fán iten ekkewe Chón Kraist mi osupwang lón Jutia me ra mochen atoura ena liffang ngeni chiener kewe ikena ie.

2 Enienin ewe ásepwál a pépélóng lón amaraan ewe siip, me ewe siip a su seni ewe oroor mi akúrang ren akúrangen aramas. Paul, Luk, me chiener kewe fúmén mwán ra nennelongei weiresin wówóón wóón mesen chiener kewe mi útá órosset. (Féf. 20:4, 14, 15) Ekkena chón sái ra kan kapwong ngeni chiener kana tori ar ra monoló seniir.

3 Ina epwe úkúúkún úlúngát ier, Paul me ekkewe mwán mi ásimaw lón Efisus ra angangfengen. Nge iei, fán emmwenien ewe ngún mi fel a sáiló ngeni Jerusalem. I a fen silei pwe epwe fis ngeni och mettóch atun a tori ikena ie. Iei met a ereni ekkena mwán mi ásimaw: “Fán emmwenien ewe ngún mi fel ngang úpwele sáiló Jerusalem inaamwo iká úse silei met epwe fis ngeniei me ikena, lúkún chék án ewe ngún mi fel pwáppwáraatá ngeniei seni lón telinimw me telinimw, me apasa pwe fétek me riáfféú ra witiwitiei.” (Féf. 20:22, 23) Inaamwo iká Paul epwe tolong lón feiengaw, nge a meefi pwe a nóm “fán emmwenien ewe ngún mi fel,” ina popun a meefi pwe mi lamot epwe feiló Jerusalem, me a mmólnetá le ló. I a aúcheani manawan, nge an féri letipen Kot, ina met a kon aúchea me ren.

4 Ina met ka pwal meefi? Lupwen sia fangoló manawach ngeni Jiowa, sia pwon ngeni pwe sipwe féri letipan me ina met sipwe kon aúcheani lón manawach. Sia tongeni kúna feiéch seni ach káé pwóróusen ewe aposel mi túppwél itan Paul.

Ra Onuchchang Seni “ewe Fénú Saipros” (Féffér 21:1-3)

5. Ia ewe siip Paul me chienan kewe re fiti e pwer ie atun a sái ngeni Tair?

5 Ewe siip Paul me chienan kewe ra fiti, a “sái weneweneló.” Weween, a mwittir pokiten múrinnéén pépéén ewe ásepwál tori ar ra tikeri Kos lón ewe chék pwal ránin. (Féf. 21:1) Ussun ewe siip a mwo ámis ikena ie eú pwiin me mwen repwe sái ngeni Rotes me Patara. Me lón Patara, lón éérún Eisia Minor, Paul me chienan kewe ra fiti efóch watteen siip sein uwou pisek mi lófóch ngeni Tair, lón Finisia. Atun ra sái ra onuchchang seni “ewe fénú Saipros.” (Féf. 21:3) Pwata ewe chón makkeei puken Féffér itan Luk, a féúni ena lón makkeian we?

6. (a) Atun Paul a kúna Saipros, pwata eli a meefi péchékkúl? (b) Atun ka ekieki ifa ussun Jiowa a efeiéchuk me álisuk, met ka meefi?

6 Eli Paul a ereni chienan kewe met a fis ngeni me ikena ie. Lón án Paul we áeúin sái lón an angangen misineri tiu ier a ló fitifengen me Parnapas me Jon Mark, ra chuuri emén sourong itan Elimas mi oputa ar afalafal. (Féf. 13:4-12) Atun Paul a kúna ena fénú, ese mwáál a cheme ngeni met a fis ngeni me ikena ie, me ina met a apéchékkúla letipan ren minne epwele fis ngeni me lón Jerusalem. Kich sia pwal tongeni kúna feiéch ren ach áchchema ngenikich ifa ussun Kot a efeiéchúkich me álisikich le likiitú fán ekkewe weires mi torikich. Ach féri ena epwe tongeni álisikich le meefieni meefien Tafit, ewe a makkeei: “Chomong riaföü ra tori ewe chon pwüng, nge ewe Samol mi Lapalap a angasala i seniir meinisin.”—Kölf. 34:19.

“Áúa Kútta me Kúna Ekkewe Chón Káé” (Féffér 21:4-9)

7. Met Paul me chienan kewe ra féri atun ra wareiti Tair?

7 Paul a silei pwe a fókkun aúchea an epwe nónnóm ren chienan kewe Chón Kraist me a mwétéresiiti an epwe nóm rer. Atun ra tori Tair, Luk a erá, “áúa kútta me kúna ekkewe chón káé.” (Féf. 21:4) Iir ra silei pwe mi wor ekkewe Chón Kraist lón Tair, ina popun ra kútter me ra kúner, iwe ese mwáál ra nóm rer. Eú me lein feiéchún ach nónnóm lón ewe enlet, pún ese lifilifil ia sia ló ie sia tongeni kúnékún chienach kewe Chón Kraist mi awasélaéchúkich. Chókkewe mi tongei Kot me fiti ewe enlet, a wor chiechier wóón unusen fénúfan.

8. Met Féffér 21:4 a wewe ngeni?

8 Paul me chienan kewe ra nómotiw Tair úkúúkún fisu rán. Lón ena atun, Luk a erá pwe a fis och mettóch ussun itá mi ámáirú, a erá: “Me ren ewe ngún mi fel [ekkewe Chón Kraist mwán chón Tair] ra ekkereni Paul an esap ipwelong lón Jerusalem.” (Féf. 21:4) Itá Jiowa a mochen án Paul epwe ló ngeni pwal eú leeni? I ese chúen mochen án Paul epwe feiló Jerusalem? Aapw. Ewe ngún mi fel a pwáári pwe Paul epwe feiengaw me lón Jerusalem, nge ese pwáári an esap feiló lón ena telinimw. Ussun fán emmwenien ewe ngún mi fel, ekkewe Chón Kraist mwán lón Tair ra weweiti pwe epwe tori Paul osukosuk me lón Jerusalem. Ina minne, pokiten ra tongei Paul ra ereni an esap ló Jerusalem. A men ffat pwe iir ra mochen túmúnú Paul seni ewe feiengaw epwele tori. Iwe nge, Paul a tipeppós le féri letipen Jiowa ina popun a sópweeló an sái ngeni Jerusalem.—Féf. 21:12.

9, 10. (a) Atun ekkewe mwán lón Tair ra tingorei Paul an esap feiló Jerusalem, menni pwóróus mi ussun chék ena a chemeni? (b) Ifa ewe ekiek a chéú lón ei fansoun, me ifa ussun a sókko seni met Jises a apasa?

9 Atun ekkena mwán ra tingorei Paul an esap feiló Jerusalem, eli a chemeni pwe pwal ina ussun meefien néún Jises kewe chón káé atun Jises a ereniir pwe epwe tolong lón Jerusalem, kúna chómmóng riáfféú, me ninniiló. Pokiten Piter a meefi an tongei Jises, iwe a ereni: “Samol, kosap apasa ena sókkun, ekkena mettóch resap fókkun fis ngonuk.” Jises a ereni: “Feiló lúkúsékúrúi, Setan! En eú minen chepetek ngeniei, pún óm ekiek, esap án Kot ekiek nge án aramas.” (Mat. 16:21-23) Jises a tipeppós le féri letipen Kot, me asoresini manawan pwe eú asor. Paul a pwal mmólnetá le kúna riáfféú me pwal mwo nge máló pwe epwe féri letipen Kot. A múrinné meefien ekkena Chón Kraist mwán lón Tair ussun chék meefien ewe aposel Piter, nge rese weweiti pwe letipen Kot án Paul epwe feiló Jerusalem.

Emén Chón Kraist mwán a kan chechcheki néún we kulók atun a fiti ewe angangen afalafal. Chienan we le afalafal a nennengeni.

A lamot sipwe pennúkúóló pwisin mochenich lón ach tapweló mwirin Jises

10 Chómmóng aramas lón ei fansoun ra filaatá ar resap féri ekkewe mettóch mi lamot nge mi weires ar repwe féri. Chómmóng aramas ra sani le fiti eú lamalam ese kan ereniir ar repwe féri are resap féri och mettóch. Nge Jises a erá pwe mi lamot sipwe eáni och ekiek mi sókkóló. A ereni néún kewe chón káé: “Iká emén a mochen tapwoto mwiri, epwe pennúkú pwisin i me angei an iráán ninni me tattapwoto mwiri.” (Mat. 16:24) Ach tattapweló mwirin Jises, ina ewe alen tipáchem me pwúng. Nge esap ina och mettóch mi mecheres.

11. Ifa ussun ekkewe chón káé lón Tair ra pwáári ar tongei Paul me álisaatá an angang?

11 Ekiseló chék a tori fansoun án Paul, Luk, me chiener kewe repwele sópweeló ar we sái. Pwóróusen ar káimufesen a pwáári úkúúkún watteen án ekkewe Chón Kraist lón Tair tongei Paul me ar mochen an epwe sópweeló an angangen afalafal. Ekkewe mwán, fefin, me ekkewe semirit ra fitaaló Paul me chienan kewe tori leppi. Iir meinisin ra fótopwúkútiw me iótek me kapwongfengen. Mwirin, Paul, Luk, me chiener kewe ra tétá wóón pwal efóch siip me sópweeló ar we sái tori Ptolemais, ikewe ra chuuri chiener kewe Chón Kraist me ra nómotiw rer eú rán.—Féf. 21:5-7.

12, 13. (a) Met Filip a féri lón ánein manawan? (b) Ifa ussun Filip a eú leenien áppirú mi múrinné ngeni ekkewe Chón Kraist sam lón ei fansoun?

12 Seni met Luk a makkeei, lón ewe rán mwirin, Paul me chienan kewe ra sái ngeni Seseria. Atun ra tori ikena, ra “tolong lón imwen Filip, ewe chón esilefeili pwóróus allim.”a (Féf. 21:8) Ese mwáál ra fókkun pwapwa le kúna Filip. Ina epwe 20 ier mwen ena, ekkewe aposel ra fen ewisa ngeni Filip an epwe álillis lón ewe angangen einet mwéngé lón ewe mineféén mwichefelin Chón Kraist lón Jerusalem. Filip i emén chón afalafal seni lóóm mi tinikken. Chemeni pwe atun ekkewe Chón Kraist ra sú seni Jerusalem pokiten ewe riáfféúmwáál, Filip a ló Sameria me a poputá le afalafal. Ló, ló, ló, a afalafal ngeni ewe iunók chón Itiopia me papataisi. (Féf. 6:2-6; 8:4-13, 26-38) Filip a túppwél le angang ngeni Jiowa ren fite fite ier.

13 Filip a chúen tinikken lón an angang ngeni Kot. Lón ewe atun a nóm Seseria, i a chúen tinikken lón ewe angangen afalafal. Sia silei ena pokiten Luk a eita ngeni “chón esilefeili pwóróus allim.” Sia pwal kúna pwe mi wor fémén néún fépwúl ra kan osuni, iwe a ffat pwe ra áppirú met semer na a féfféri.b (Féf. 21:9) Ese mwáál Filip a angang weires le álisi an we famili ar repwe tongei Jiowa me angang ngeni. A múrinné án ekkewe Chón Kraist sam lón ei fansoun repwe áppirú an leenien áppirú, repwe fiffiti ewe angangen afalafal, me álisi néúr kewe ar repwe ámááraatá ar aúcheani ewe angangen afalafal.

14. Met a fis atun Paul a ló chuuri chienan kewe Chón Kraist, me ifa ussun sia tongeni áppirúúr?

14 Ekis meinisin ia Paul a ló ie, a kan kútta chienan kewe Chón Kraist me chiechi ngeniir. Ese wor tipemwárámwár pwe ekkewe Chón Kraist lón ekkena leeni, ra pwapwa le etiwa Paul me chienan kewe. Ese mwáál ar chufengen a fókkun ‘apéchékkúla emén me emén leir.’ (Rom 1:11, 12) A pwal suuk ngenikich ena esin fansoun. Ese lifilifil ifa lélléén imwach, sipwe fókkun feiéch iká sipwe awasélaéchú ewe chónemmwen mi wisen sáifetál me pwúlúwan we.—Rom 12:13.

SESERIA—EWE IOLAPEN JUTIA MI NÓM FÁN NEMENIEN ROM

Minne a mak lón puken féffér, a fis atun Seseria ewe iolapen Jutia a nóm fán nemenien Rom. Ewe governor a kan nóm Seseria, me ewe iolapen leenien mwichen soufiu a pwal nóm ikena. Erot mi Lap a féri ena telinimw me a eita seni iten Sisar Aukustus. A wor lón Seseria meinisin ekkewe mettóch mi pwal nóm lón ekkewe telinimw mi fel ngeni kot chofona, áwewe chék eú imwenfel ngeni Sisar Aukustus me sókkopaten leenien katol sipai. Lape ngeni ekkewe aramas mi nónnóm ikena, iir chón lúkún Israel.

Seseria ina eú telinimw mi péchékkúl fférún. Ewe mineféén oroor lón ena telinimw, a iteni Sebastos (ina eú fósun Krik fán iten Aukustus), me a wor eú watteen eppetin sáát únúkkún pwe epwe túmúnú ena oroor an esap ta ren watteen lóóló. Ena a ámecheresi án ekkewe siip repwe ssálong me ssáwu seni ena oroor. Erot a mochen an na telinimw me oroorun we repwe fókkun múrinné lap seni Aleksantria, ewe iolapen leenien amémé me kamé mi nóm éétiwen Mediterranean. Inaamwo iká Seseria ese tikeri úkúúkún múrinnéén Aleksantria, nge a iteféúló wóón unusen fénúfan pokiten leenian we a múrinné fán iten pekin business.

Ewe chón afalafal Filip a esilefeili ewe kapas allim lón Seseria, me ussun ina ewe leeni i me an we famili ra mwékút ngeni ie. (Féf. 8:40; 21:8, 9) Ina ewe leeni ewe meilapen soufiun Rom itan Kornelius a nóm ie me a pwal wiliiti emén Chón Kraist me ikena ie.—Féf. 10:1.

Ewe aposel Paul a ló Seseria fán chómmóng. Ekiseló chék mwirin an we a wiliiti emén Chón Kraist, atun ekkewe chón oputa ra akkóta ar repwe nieló, ekkewe chón káé ra panaló 55 mwail seni Jerusalem ngeni Seseria pwe repwe tiinaaló wóón efóch siip ngeni Tarsus. Paul a kan tori ewe oroor Seseria atun a sái ngeni Jerusalem lesópwólóón an we oruuen me aúlúngátin sái lón an angangen misineri. (Féf. 9:28-30; 18:21, 22; 21:7, 8) A kalapus ruu ier lón imwen Erot we lón Seseria. Me ikena ie, a fós ngeni Feliks, Festus, me Akripa, iwe, seni me ikena a sái ngeni Rom.—Féf. 23:33-35; 24:27–25:4; 27:1.

MI FICH NGENI EKKEWE FEFIN CHÓN KRAIST AR REPWE CHÓN ASUKUL?

Lón fansoun ekkewe aposel, met án ekkewe fefin angang lón ewe mwichefelin Chón Kraist? Ekkewe fefin ra tongeni chón asukul?

Jises a allúkú ngeni néún kewe chón káé ar repwe afalafala ewe kapas allim ussun ewe Mwú me asukula aramas pwe repwe wiliiti chón tapweló mwirin. (Mat. 28:19, 20; Féf. 1:8) Ena angangen afalafala ewe kapas allim, ina wisen meinisin Chón Kraist, ese lifilifil iká iir mwán, fefin, át, are nengngin. Sia silei pwe mi pwúng ena seni met ei oesini lón Sowel 2:28, 29 a apasa, ewe wokisin ewe aposel Piter a pwáári pwénútáán lón ewe Pentikos 33 mwirin Kraist: “Kot a apasa, ‘Me lón ekkewe ránin lesópwólóón, úpwe ninatiw och ái we manaman wóón sókkopaten futuk, me néúmi kewe át me néúmi kewe nengngin repwe osuni . . . me pwal mwo wóón nei kewe slave mwán me wóón nei kewe slave fefin úpwe ninatiw och ái we manaman lón ekkena rán, me repwe osuni.’” (Féf. 2:17, 18) Pwal och, ewe chón afalafal Filip a wor fémén néún fépwúl ra kan osuni.—Féf. 21:8, 9.

Iwe nge, án Kot we Kapas a affata pwe ekkewe chék mwán ra tongeni chón emmwen are chónálillisin mwichefel me asukul lón mwichefel. (1 Tim. 3:1-13; Tait. 1:5-9) Ren enletin, iei met Paul a erá: “Úse mut ngeni emén fefin an epwe asukul are nemenem wóón emén mwán, nge epwe chék fanafaneló.”—1 Tim. 2:12.

“Ngang Úa Fen Mmólnetá . . . Ái Úpwe Pwal Máló” (Féffér 21:10-14)

15, 16. Ifa ewe pwóróus Akapus a uwei, me met chókkewe mi rong ra meefi me féri?

15 Atun Paul a nóm ren Filip, Akapus a war. Chókkewe mi nóm lón imwen Filip na ra silei pwe Akapus emén soufós. A osuni pwe epwe fis eú watteen lengita atun án Klautius wisen nemenem. (Féf. 11:27, 28) Ese mwáál ra ekieki: ‘Pwata Akapus a feito? Met sókkun pwóróus a uweato?’ Atun ra nennengeni, a angei án Paul we penit, och sókkun penitin lukanapan mi tongeni uwoulóng moni are ekkóch mettóch lón. Akapus a fééti ngeni pwisin pechen me péún. Mwirin, a fós. Minne a erá a fókkun eletipechou: “Iei met ewe ngún mi fel a apasa, ‘Epwe iei ussun án ekkewe chón Jus lón Jerusalem repwe fééti ewe mwán minne ká an ei penit, me repwe atolonga i lepéún aramasen ekkewe ekkóch mwú.’”—Féf. 21:11.

16 Ena oesini a alúkúlúkú pwe Paul epwe ló Jerusalem. A pwal pwáári pwe ekkewe chón Jus ikena ie repwe atolonga Paul “lepéún aramasen ekkewe ekkóch mwú.” Chókkewe mi rong ena oesini ra fókkun lólilen. Luk a makkeei: “Lupwen áúa rong ei, ám me chókkewe mi nóm ikena áúa poputá le tingormaw ngeni an esap feitá Jerusalem. Mwirin, Paul a pélúweni: ‘Met ei oua féri ren ámi kechiw me sótun apwangapwangaaló letipei? Ngang úa fen mmólnetá esap chék ái úpwe féfé nge ái úpwe pwal máló lón Jerusalem fán ásengesin iten ewe Samol Jises.’”—Féf. 21:12, 13.

17, 18. Ifa ussun Paul a pwáári an tipeppós, me met ekkewe Chón Kraist ra meefi?

17 Anchangei met ewe a fis. Chienen Paul kewe kapachelong Luk, ra tingormaw ngeni Paul an esap ló Jerusalem. Ekkóch leir ra kechiw. Paul a kúna pwe ra fókkun tongei me ra chúngú i. Ina minne, a kapas pwetete le ereniir pwe ra ‘sótun apwangapwangaaló letipan.’ Nge a chúen tipeppós, i ese mut ngeni chiechian kewe lón Tair ar repwe amwéchú an esap feiló Jerusalem, me iei esap pwal mut ngeni chiechian kana lón Seseria. A fen chék áweweei ngeniir popun a lamot an epwe ló. A ifa me pworaan me tipeppósun Paul! Paul a tipeppós ussun chék Jises le feiló ngeni Jerusalem. (Ipru 12:2) Paul ese mochen an epwe máló, nge iká epwe fis ngeni ena, me ren pwe ina eú feiéch pokiten i emén néún Kraist Jises chón káé.

18 Met ekkena Chón Kraist ra meefi? Ra súféliti án Paul kefil. Paipel a erá: “Lupwen áúa kúna pwe áúse tongeni siwili ekiekin, áúa úkútiw le eppeti me áúa apasa: ‘Letipen Jiowa epwe fis.’” (Féf. 21:14) Chókkewe mi ereni Paul an esap ló Jerusalem rese chúen péchéú ngeni an epwe fitaaló mocheniir. Ra aúseling ngeni Paul me tipemecheres ngeni. Ra pwal mirititi pwe mi lamot repwe etiwa met Jiowa a tipeni fán iten Paul inaamwo iká esap ina met ra mochen. Paul a poputááni an we sái, ewe epwele emmwen ngeni ninniilóón. Epwe fen mecheres ngeni Paul iká chókkewe mi tongei rese eppeti an epwe ló Jerusalem.

19. Ifa ewe lesen mi aúchea sia káé seni minne a fis ngeni Paul?

19 Sia káé ei lesen mi aúchea seni met a fis ngeni Paul: Sise fókkun mochen eppeti ekkewe ekkóch lón ar pennúkúóló pwisin mocheniir pwe repwe angang ngeni Kot. Sia tongeni apwénúetá ei lesen lón chómmóng mettóch. Áwewe chék, atun chómmóng sam me in Chón Kraist ra meefi áweiresin án néúr kewe mwékút ngeni eú leeni mi towaw lón ar angang ngeni Jiowa, ra tipeppós ar resap epitaaló letiper. Phyllis, ewe a nóm England, a chemeni meefian atun néún we ákkáláemén nengngin a ló fiti angangen misineri lón Afrika. Phyllis a erá: “Ina eú fansoun mi fókkun áweires ngeniei.” A pwal erá: “Úa fókkun letipengaw pokiten úa silei pwe epwe fókkun towaw seniei. Úa letipengaw nge pwal pwapwa. Úa iótek fán chómmóng. Nge pwisin ina met a filaatá, me úse fókkun mochen etipetipa an epwe liwinto. Pún ren enletin, úa kan ákkáiti ngeni iteitan an epwe akkomwa angangen ewe Mwúún Kot. A fen 30 ier an álillis lón ekkewe fénúen ekis, me úa kilisou ngeni Jiowa iteiten rán ren an túppwél.” A ifa me múrinnéén atun sia pesei chókkewe mi pennúkúóló chómmóng mettóch pwe repwe angang ngeni Jiowa!

Fitu sasing: Ekkewe sam me in me eú pea pwúpwúlú iir misineri. 1. Ekkewe sam me in ra pwapwa le kékkéri néúr kewe wóón phone. 2. Ewe pean pwúpwúlú ra pwapwa le pélúweni néúr we phone atun ar misineri lón eú fénú towaw.

A múrinné ach sipwe apéchékkúla chienach kewe mi pennúkúóló pwisin mocheniir

“Pwiim Kewe Ra Etiwakem fán Pwapwa” (Féffér 21:15-17)

20, 21. Met a affata pwe Paul a mochen chiechi ngeni chienan kewe Chón Kraist, me pwata a mochen chiechi ngeniir?

20 Mwirin án Paul ammólnatá mettóchun an we sái, iwe a ló nge chienan kewe Chón Kraist seni Seseria ra fiti. A pwá pwe iir chiechi mi túppwél me álilliséch. Lón iteiten leeni ikewe Paul me chienan kana ra tikeri lón ar na sái ngeni Jerusalem, ra kan achocho le kútta alen ar repwe chiechi ngeni chiener kewe Chón Kraist. Atun ra nóm Tair, ra chuuri ekkewe chón káé me ra nóm rer fisu rán. Atun ra nóm Ptolemais, ra ló kapwong ngeni chiener kewe Chón Kraist me nóm rer eú rán. Atun ra nóm Seseria ra nóm fitu rán lón imwen Filip we. Mwirin, ekkóch me lein ekkewe chón káé seni Seseria ra fitiireló tori Jerusalem, ikewe ra waséla ie lón imwen Manason, emén chón káé lóóm. Iwe, atun Paul me chienan kewe ra tori Jerusalem, Luk a erá pwe ‘pwiir kewe ra etiwer fán pwapwa.’—Féf. 21:17.

21 A ffat pwe Paul a mochen nóm ren chiechian kewe Chón Kraist. A meefi péchékkúlen letipan atun a chiechi ngeniir ussun chék pwal kich lón ei fansoun. Ese wor tipemwárámwár pwe ina met a apéchékkúla Paul an epwe likiitú fán ewe riáfféúmwáál epwele tori seni ekkewe aramas mi song mi mochen nieló.

a Ppii ewe pwóór “Seseria—Ewe Iolapen Jutia mi Nóm fán Nemenien Rom.”

b Ppii ewe pwóór “Mi Fich Ngeni Ekkewe Fefin Chón Kraist Ar Repwe Chón Asukul?”

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share