Jesus A Amwéngééú Chómmóng Aramas

A WOR eú pwóróus mi ámáirú. Johannes Papatais a kerán ninniiló. Herotias, pwúlúwen ewe king, ese sani i. Iwe, a féri met ewe king epwe túnú ren úwen Johannes.

Lupwen Jesus a rong ei pwóróus, a fókkun letipechou. A áláeménúló lón eú leeni mi towau seni aramas. Nge ekkewe aramas ra tapweló mwirin. Lupwen Jesus a kúna ewe pwiin aramas, a tonger. Iwe, a pwóróus ngeniir usun ewe mwúún Kot, a pwal apéchékkúla ekkewe mi samau leir.

Lón ena kuniolun, néún kewe chón káé ra feito ren me ra apasa: ‘A fen lekuniol me ei leeni a towau seni telinimw. Kopwe tiinaaló ekkewe aramas pwe repwe tongeni kamé ener mwéngé lón ekkewe sóópw mi kkanoto.’

Jesus a pélúweni: ‘Esor popun ar repwe feiló. Ámi oupwe amwéngééniir.’ A kul ngeni Filip me eisini: ‘Ia sipwe tongeni kamé me ie naféchún mwéngé pwe sipwe tongeni amwéngééú meinisin ekkeei aramas?’

Filip a pélúweni: ‘Epwe watte moni towu ika sipwe kamé mwéngé fán iten án emén me emén epwe áni ekis chék.’ Andru a fósetá: ‘Ei át a uwei nimeféú féún pilawa me rúúemén iik. Nge ese akkarapen naf ngeni meinisin ekkeei aramas.’

Jesus a apasa: ‘Oupwe ereni ekkewe aramas pwe repwe móttiw wóón ewe sipa.’ Mwirin, a apasa an kilisou ngeni Kot ren ewe mwéngé me a poputá le kinikisietiw ewe mwéngé. Mwirin, ekkewe chón káé ra eineti ekkewe pilawa me iik ngeni meinisin ekkeei aramas. Mei wor 5,000 mwán me pwal fite ngeréú fefin me semirit. Iir meinisin ra mwéngé tori ar ra métúló. Iwe, lupwen ekkewe chón káé ra ioni ewe lusun, a ur 12 chúúk ren!

Iwe iei, Jesus a ereni néún kewe chón káé pwe repwe tétá wóón efóch mwoota pwe repwe sáiló tori pekilóón ewe setin Kalili. Pwinitiw a fis eú mélúmél watte, iwe ekkewe nó ra erikifetálei waar we. Ekkewe chón káé ra fókkun niwokkus. Iwe lukenipwin, ra kúna emén an a fetáleto rer wóón ewe sáát. Ra púchér lón ar niwokkus, pún rese silei met ewe ra kúna.

Jesus a apasa: ‘Ousap niwokkus. Ngang ei!’ Nge ra chúen lúkúlúkúmmang. Iwe Petrus a apasa: ‘Ika pwe wesewesen en ena, Samol, kopwe ereniei pwe upwe fetál wóón ewe sáát pwe upwe toruk.’ Jesus a pélúweni: ‘Feito!’ Iwe, Petrus a tétiw me a fetál wóón ewe sáát! Iwe a niwokkus, a poputá le kokotiw, nge Jesus a seláni.

Mwirin, Jesus a pwal amwéngééú fite ngeréú aramas. Lón ei atun a amwéngéniir fúféú pilawa me ekkóch kúkkúnún iik. A pwal naféch ngeni meinisin. Esap pwe a fókkun múrinné napanapen án Jesus túmúnú aramas? Ika a tori ewe fansoun an epwele nemenem lón ewe wis néún Kot king, sisap chúen mwo nge lólilen usun och mettóch!