Petrus A Chuuri Kornelius

IEI i ewe aposel Petrus mi úkkúútá ikeei me ikkeei iir ekkóch chienan kewe lesékúrún. Nge pwata ena mwán a fótopwúkútiw mwen Petrus? Mi éch an ina usun? Ka silei ié na?

Ei mwán, i Kornelius. I emén meilapen soufiun Rom. Kornelius ese silei Petrus, nge emén a ereni pwe epwe etiwaalong lón imwan we. Sipwe ppii ifa usun an a fis ei mettóch.

Ekkewe chón áppirú Jesus mi akkomw, iir Jus, nge Kornelius esap re Jus. Iwe nge a tongei Kot, a kan iótek ngeni me féri chómmóng mettóch mi múrinné fán iten aramas. Iwe lón eú kuniolun, emén chónláng a pwá ngeni me a apasa: ‘Kot a pwapwaituk, iwe epwe pélúweni óm kewe iótek. Kopwe tiinaaló ekkóch mwán pwe repwe tiiti emén mwán itan Petrus. A kan nónnóm Joppa lón imwen Simon we órosset.’

Iwe mwittir chék, Kornelius a tiinaaló ekkóch mwán pwe repwe kútta Petrus. Iwe sorotáán, lupwen ekkewe mwán ra akkarap ngeni Joppa, Petrus a nóm wóón osun imwen Simon we, nge ewe oos mi chék chépép. Me ikena ie, Kot a efisi och lángipwi ngeni Petrus pwe epwe kúna eché mangaku mi chéwatte an a feffeitiw seni láng. Lón ewe mangaku, a wor chómmóng sókkun man. Me ren án Kot we allúk, ikkeei iir ekkewe man mi limengaw ar repwe ocheer, iwe nge eú méngúngú a apasa: ‘Kele útá Petrus. Nireló me ocheer.’

Petrus a pélúweni: ‘Aapw! Ese mwo fán eú ai upwe ochoch met ese liméch.’ Nge ewe méngúngú a ereni Petrus: ‘Kosap erá pwe mi limengaw minne Kot a apasa pwe mi liméch iei.’ Ena mettóch a fis fán úlúngát. Lupwen Petrus a ekkekieki ika met weween ewe mettóch, ekkewe mwán mi kúnéto me ren Kornelius ra wareiti ewe imw me ra eis Petrus.

Petrus a pweretiw fan me a apasa: ‘Ngang ewe mwán oua kútta. Met popun oua feito?’ Lupwen ekkewe mwán ra áweweei pwe emén chónláng a ereni Kornelius pwe epwe etiwaalong Petrus lón imwan we, Petrus a tipeeú ngeni an epwe fitiir. Lón ewe rán mwirin, Petrus me chienan kewe ra feiló pwe repwe chuuri Kornelius lón Seserea.

Kornelius a emwichafengenni márárin kewe me chiechian kewe. Lupwen Petrus a war, Kornelius a souni. A chapetiw me fótopwúkútiw mwen pechen Petrus, usun en mi kúna me ikeei ie. Nge Petrus a apasa: ‘Útá, ngang pwal emén chék aramas.’ Iwe, ewe Paipel a pwáraatá pwe ese pwúng án aramas chapetiw me fel ngeni emén aramas. Sipwe fel ngeni Jiowa chék.

Iwe iei, Petrus a afalafala iir kewe mi chuto. Petrus a apasa: ‘Ua weweiti pwe Kot a etiwa aramas meinisin mi mochen angang ngeni.’ Iwe lupwen an fóffós, Kot a tiinatiw an we manaman mi fel, iwe ekkewe aramas ra poputá le kapas lón sókkópaten fós. Ekkewe chón káé iir chón Jus mi fiti Petrus ra ingeló ren ei mettóch pún tittiper pwe Kot a echeni ekkewe chék chón Jus. Iwe, ei mettóch a áiti ngeniir pwe Kot ese ekieki pwe chón eú chék mwú are einang ra múrinné are aúchea lap seni chón ekkewe lusun mwú me einang. Esap pwe ina eú mettóch mi múrinné oukich meinisin sipwe chechchemeni?