Kornelius A Angei ewe Ngún mi Fel

A wor emén meilapen soufiun Rom mi iteféúló itan Kornelius lón Seseria. Inaamwo iká esap i chón Jus, nge ekkewe chón Jus ra súféliti. A kan álisi ekkewe mi osupwang me ekkewe mi tekison. Kornelius a lúkú Jiowa me a kan ikkiótek ngeni iteitan. Lón eú atun, emén chónláng a pwá ngeni Kornelius me a ereni: ‘Kot a rongorong óm iótek. Kopwe tiinaaló ekkóch mwán ngeni ewe telinimw Joppa, ikewe Piter a nónnóm ie, me ereni pwe epwe feito reom.’ Mwittir chék, Kornelius a tiinaaló úlúmén mwán ngeni Joppa, ina epwe úkúúkún 30 mwail towauan ngeni éér.

Iwe nge, lón pwal ena atun Piter a kúna eú lángipwi me lón Joppa. A kúna ekkóch man ese mumu ngeni ekkewe chón Jus ar repwe ochooch, iwe a rong eú méngúngú a ereni pwe epwe ochooch. Nge Piter ese mochen, a erá: ‘Esap fán eú ái úpwe ochooch man mi limengaw.’ Iwe, ewe méngúngú a ereni: ‘Kosap apasa pwe ekkeei man ra limengaw. Kot a fen eliméchúúr.’ A pwal ereni Piter: ‘Mi wor úlúmén mwán ra nóm ren asamom we. Kopwe feiló rer.’ Piter a feiló ren asaman we me a eisini ekkewe mwán pwata ra nóm ikena. Ra pélúweni: ‘Kornelius, ewe meilapen soufiun Rom a tiinikemito. Kopwe feiló ren imwan we lón Seseria.’ Piter a etiwa ekkena mwán ar repwe waséla lón imwan we eú pwiin. Sorotá ewe rán, Piter me ekkóch chienan seni Joppa ra fitiir ngeni Seseria.

Atun chék Kornelius a kúna Piter, a fotopwásukutiw. Nge Piter a ereni: ‘Kopwe útá! Ngang emén aramas ussum chék. Kot a ereniei pwe úpwe feito ren imwom ei, inaamwo iká chón Jus rese kan tolong lón imwen ekkewe chón lúkún Israel. Iwe, kese mochen kopwe ereniei pwata ka tiiti ngang.’

Kornelius a ereni Piter: ‘Rúáánú rán a ló, úa iótek ngeni Kot, iwe emén chónláng a ereniei pwe úpwe tiiti en. Kese mochen áiti ngenikem met Jiowa a apasa.’ Piter a erá: ‘Iei úa weweiti pwe Kot ese lifilifil aramas. A etiwa ese lifilifil ié mi mochen fel ngeni.’ Piter a asukuler chómmóng mettóch ussun Jises. Mwirin ewe ngún mi fel a feitiw wóón Kornelius me ekkewe mi nóm ren, iwe meinisin ra papatais.