Paulus Lón Rom

NENGENI ekkena sein wóón Paulus me ena soufiun Rom mi mammasa. Paulus emén chón fétek lón Rom. A witiwit tori an epwe kapwúngúló me ren ewe sou nemenemen Rom Sisar, ika met epwe féri ngeni. Lupwen an a fétek, ra mut ngeni aramas ar repwe chuchchuuri.

Úlúngát rán mwirin án Paulus tori Rom, a titiito ekkóch sou emmwenien Jus pwe repwe etto chuuri i. Ina popun chómmóng chón Jus lón Rom ra feito. Paulus a afalafal ngeniir usun Jesus me ewe mwúún Kot. Ekkóch ra lúkú me ra wiliti Chón Kraist, nge ekkewe ekkóch rese lúkú.

Paulus a pwal afalafala ekkewe soufiu mi wisen mammasa i. Lón ewe úkúkún ruu ier an a fétek ikena ie, a afalafala aramas úkúkún an tufich. Ina popun chón leimwen Sisar mwo ra pwal rong usun ewe kapas allim usun ewe Mwú me ekkóch me leir ra wiliti Chón Kraist.

Nge ié ei a etto chuuri Paulus me mammak wóón ei cheepel? Ka tongeni esilla? Ewer, iei i Timoty. Timoty a fen pwal nóm lón imwen fétek pokiten an afalafal usun ewe Mwú, nge a fen musowu. Iwe, a feito ikeei ie pwe epwe álisi Paulus. En mi silei met Timoty a makkeei? Sipwe ppii.

En mi chechchemeni ekkewe telinimw Filipi me Efisos lón ewe Pwóróus 110? Paulus a álisi poputáán ekkewe mwichefelin Chón Kraist lón ekkena telinimw. Iwe iei, lupwen Paulus a nónnóm lón kalapus, a mak taropwe ngeni ekkena Chón Kraist. Ekkena taropwe ra nóm lón ewe Paipel me ra iteni Efisos me Filipi. Iei Paulus a ereni Timoty met epwe makkeei ngeni chiener kewe Chón Kraist lón Filipi.

Ekkewe chón Filipi ra fókkun kirekiréch ngeni Paulus. Ra titiito ar liffang ngeni lupwen a nónnóm lón imwen fétek ikeei ie ina pwata Paulus a kilisou ngeniir. Epafrotitus, i ewe mwán mi uweato ewe liffang. Nge a úri eú semmwen watte, iwe arapakkan epwe má. Nge iei a chikarsefál me a fen mmólnetá an epwele liwiniti leenian. Iwe epwe uwei ei taropwe seni Paulus me Timoty ika a liwinló Filipi.

Lupwen Paulus a nónnóm lón ewe imwen fétek, a pwal makkeei rúúaché taropwe mi nóm lón ewe Paipel. Eché ngeni ekkewe Chón Kraist lón Kolose. En mi silei met ra eita ngeni? Kolose. Ewe eché taropwe néún Paulus ngeni chiechian we Filimon, ewe mi pwal nónnóm lón Kolose. Ena taropwe a kapas usun Onesimus néún Filimon we chón angang.

Onesimus a sú seni Filimon me a feito Rom. Ese ffat ifa usun án Onesimus silei án Paulus nónnóm lón imwen fétek ikeei. A etto chuuri Paulus, iwe Paulus a afalafal ngeni. Mwirin ekis fansoun, Onesimus a pwal wiliti emén Chón Kraist. Iwe iei, Onesimus a mengiringir ren an sú. Iwe, ka silei met Paulus a makkeei lón néún we taropwe ngeni Filimon?

Paulus a tingorei Filimon an epwe omusaaló Onesimus. Paulus a makkeei: ‘Ua tiinaalósefál Onesimus ngonuk. Nge iei, esap i emén noum chón angang chék. Pwal i emén pwiich Chón Kraist mi múrinné.’ Lupwen Onesimus a liwinló Kolose, a uwei ekkeei rúúaché taropwe, eché ngeni ekkewe chón Kolose me ewe eché ngeni Filimon. Sia tongeni anchangei úkúkún pwapwaan Filimon lupwen a silei pwe néún we chón angang a fen wiliti emén Chón Kraist.

Lupwen Paulus a mak ngeni Filimon me ekkewe chón Filipi, a apwóróuseer ekkóch pwóróus mi fókkun múrinné. Paulus a ereni ekkewe chón Filipi: ‘Ua tiinaaló Timoty ngenikemi. Nge upwele pwal chuurikemi ekiseló.’ Iwe a mak ngeni Filimon: ‘Kele ammólnatá eú leeniei pwe upwe nónnóm ikena ie.’

Lupwen Paulus a musowu, a chuuri chienan kewe mwán me fefin Chón Kraist lón chómmóng leeni. Nge mwirin, Paulus a pwal féteksefál lón Rom. Iei a silei pwe epwele ninniiló. Ina popun a mak ngeni Timoty me a ereni pwe epwe mwittirito ren. Paulus a makkeei: ‘Ua fen tuppwél ngeni Kot me i epwe liwiniei.’ Fitu ier mwirin án Paulus ninniiló, Jerusalem a tasefál, nge iei ren ekkewe chón Rom.

Nge mei wor chómmóng pwóróus lón ewe Paipel lúkún ekkeei. Jiowa Kot a ewisa ngeni ewe aposel Johannes an epwe makkeei ekkewe sáingoon puk lón ewe Paipel, pwal pachelong ewe puken Pwärätä. Ei puk a apwóróusa usun mwachkkan. Iwe iei, sipwe káé met masouen lón ekkan fansoun mwach.