Pwapwaesini Kokkotun Famili
Ekkewe famili repwe tongeni wesewesen pwapwa?
Epwe ifa usun an epwe tufich?
En mi silei ekkoch famili mi tipeeufengen me pwapwa usun chok ekkeei famili lon ei taropwe? Ekis meinisin ekkewe famili ra tatakkiselo. Mufesen, lukulukungauen ar angang, osukosuken ekkewe sam are in esor puluwer, letipengau—ekkeei mettoch meinisin ra efisata osukosuk. Emon sou kaeo kokkotun famili a apasa: “Lon ei fansoun aramas meinisin ra fen rongorong porausen katatiuen ewe famili.”
Pwata a tori ekkewe famili ikenai chommong osukosuk mi chou? Epwe ifa usun sipwe tongeni pwapwaesini kokkotun famili?
Poputaan Ewe Kokkotun Famili
Ren ach sipwe polueni ekkena kapas eis, a lamot sipwe silei usun poputaan pupulu me famili. Popun, pun ika a wor emon Chon Poputani—emon Chon Forata—chon ekkewe famili repwe kutta kapasen emmwen seni, pun epwe sileifichi ifa usun sipwe unusen pwapwaiti kokkotun ewe famili.
Iwe nge, a eu minen amwarar pwe chommong ra luku pwe esor Chon Poputani ewe kokkotun famili. The Encylopedia Americana a apasa: “Ekkoch sou kaeo ra ekieki pwe pupulu a pop seni an ekkewe man akkaruuemon.” Iwe nge, Jises Kraist a kapas usun forutaan mwan me fefin. A aloni alon ewe Paipel, iwe, a era: “Minne Kot a apachafengenni, aramas resap aimufeseni.”—Mattu 19:4-6.
Iwe, mei pwung ren Jises Kraist. Emon Kot mi tipatchem a forata ekkewe popun aramas me akkota ewe famili pwe epwe pwapwa. Kot a wisen apupulua ewe akkaeuin pean aramas, iwe, a era pwe ewe mwan “epwe pach ngeni puluan o repwe wiliti eu chok fituk.” (Keneses 1:22-24) Ina minne, ren porausen fitikoko lon famili ikenai, rese pop seni an aramas manaueni ewe sokkun manau mi appolua ekkewe kapasen emmwen Kot a awora lon an we Kapas ewe Paipel?
Ifa Ewe Alen Sopwoch?
Ese mwaal ka fen silei pwe ei otot ikenai a apochokkulata an aramas ekkekieki pwisin ir me minne chok repwe kuna feioch ren. Emon sou angang lon pekin moni a ereni ekkewe chon sochungio seni eu college lon ewe United States, “Tipemmong a murinno. Mei tufich om kopwe tipemmong, nge kopwe chuen meefi kinamwe.” Nge an aramas chechchei pisek ese emmwen ngeni sopwoch. Enlet, kutten woummong, ina ewe mettoch a efeiengaua kokkotun famili lap seni meinisin pun a eppeti an aramas chiechifengen me a pwal solani an aramas fansoun me moni. Iwe, ren wewefesennin ekiekin aramas me ewe Paipel, sipwe afanni ruu chok mwitun lon ewe Paipel mi aiti ngenikich met a efisata pwapwa.
“A murinno ach mongofengen iasai, nge mi wor tong lefilach, lap seni ach ochochfengen fituken kow mi kiris, nge mi wor koput lefilach.”
“A murinno an emon mongo elulu mongo mi pwasapwas, nge mi wor kinamwe, lap seni an epwe eti eu mongon kametip lon eu imw mi wor fitikoko lon.”
An Solomon Fos 15:17; 17:1, “Today’s English Version.”
Fokkun pwungun, ika met? Ekieki mwo watten sokkofesenin ewe fonufan ika ekkewe famili meinisin repwe akkomwa ekkena mettoch! Ewe Paipel a pwal awora emmwen mi auchea usun an chon ekkewe famili foffor lefiler. Ekieki mwo pwal ekkoch chok kapasen emmwen a awora.
Ekkewe Mwan Pupulu: ‘Kopwe tongei puluwom usun chok pwisin inisum.’—Efisus 5:28-30.
A ffatafatoch, nge a pwal fokkun pwung! Ewe Paipel a pwal ereni ewe mwan an epwe ‘asamolu puluan we.’ (1 Piter 3:7) A fori ena mettoch ren an afanniochu pachelong an kirokiroch ngeni, weweochuti me alukulukuochu ngeni. Epwe pwal aucheani ekiekin ewe fefin me auseling ngeni. (Allofengenni Keneses 21:12) Kese tipeeu ngeni ei poraus pwe famili meinisin repwe feioch ika ewe mwan pupulu epwe fofforoch ngeni puluwan we, usun chok a mochen pwe puluwan we epwe pwal fori ngeni?—Mattu 7:12.
Ekkewe Fin Pupulu: “Oupwe menniniti [puluwemi kewe].”—Efisus 5:33.
Emon fin pupulu a efisata pwapwa lon ewe famili ren an alisi puluwan we le apwonueta wisan kewe mi chou. Ina ewe kokkot, pun Kot a awora ewe fefin pwe epwe “emon chon alillis ngeni ewe mwan, emon mi wewe ngeni.” (Keneses 2:18) En mi mirititi feiochun ewe famili lupwen emon fin pupulu a pwarata an sufoliti puluwan we ren an peppeni minne ewe mwan a filata pwe repwe angangfengen fan iten sopwochun ewe famili?
Chon Pupulu: “A lamot ngeni ekkewe mwan me fefin ar repwe tuppwolfengen lefiler.”—Ipru 13:4, TEV.
Lupwen repwe ina usun, epwe feioch ewe famili. Fan chommong, lisou mwaal a fokkun ataietiu eu famili. (An Solomon Fos 6:27-29, 32) Ina popun ewe Paipel a tipatchem le pesei aramas: “Kopwe pwapwaiti puluwom o meseikeiti ewe fopul ka pulueni lupwen om aluwon . . . Pwata kopwe ngeni pwal emon fefin om tong?”—An Solomon Fos 5:18-20, TEV.
Ekkewe Sam me In: “Akaiti [noumi kewe semirit] usun minne epwe murinno [ngenir].”—An Solomon Fos 22:6.
Lupwen ekkewe sam me in repwe awora fansoun me tumun ngeni nour kewe, epwe fokkun murinnolo kokkotun ewe famili. Ina minne ewe Paipel a pesei ekkewe sam me in ar repwe asukula nour kewe semirit ‘lupwen ra mot lon imwer kewe, pwal lupwen ra fetal won al, me lupwen ra konolo pwal lupwen ra pwata.’ (Tuteronomi 11:19) Ewe Paipel a pwal apasa pwe ekkewe sam me in repwe pwarata ar tongei nour kewe ren ar emiritir.—Efisus 6:4.
Ekkewe Nau: “Ami semirit kana, oupwe alleasochisi sememi kewe me inemi lon ewe samol.”—Efisus 6:1.
Pwungun, lon ei fonufan mi ur ren atai alluk, ese mecheres ami oupwe alleasochisi sememi kewe me inemi fansoun meinisin. Iwe nge, ouse tipeeu pwe epwe pwarata tipatchem ach sipwe fori minne ewe Chon Poputani a erenikich? A silefichi minne epwe amurinnolo mwokutukutun ach famili. Ina minne, achocho ngeni ami oupwe alleasochisi sememi kewe me inemi. Oupwe uppos lon ami su seni ekkewe chommong sossotun ei fonufan epwe etipetipakemi pwe oupwe foffor ingau.—An Solomon Fos 1:10-19.
Ukukun an emon me emon chon ewe famili apwonueta an Paipel kewe fon, epwe pwal ina ukukun an ewe famili epwe ochulo. Lapalapen manauen ewe famili esap chok murinnolo lon ei fansoun, nge epwe pwal wor ewe apilukuluk allim lon ewe fonufan sefo Kot a pwonetiu fan iten mwachkkan. (2 Piter 3:13; Pwarata 21:3, 4) Iwe, eorenalo oupwe kaeofengen ewe Paipel! Fite million famili won unusen fonufan ra kuna alillis watte seni ewe emmwen mi kawor lon ewe puk mi wor chommong lios lon mi lingoch, itan Sile Mi Emmwen Ngeni Manau Esemuch.
Ika ese fen pwa, meinisin ekkewe wokisin lon ei taropwe ra popu seni ewe New World Translation of the Holy Scriptures.