“Kopwe Tipepwora!”

1, 2. Pwata Paul ese máirú ren ewe riáfféúmwáál a kúna me lón Jerusalem?

MWIRIN án Paul ngaseló seni lein ewe mwichen aramas mi fókkun song lón Jerusalem, a pwal kalapus sefál. I ese máirú ren ei riáfféúmwáál a kúna me lón Jerusalem. A fen silei pwe epwe “fétek me riáfféú” me lón ena telinimw. (Féf. 20:22, 23) Inaamwo iká Paul ese silei tichikin met epwe fis, nge a silei pwe epwe sópwósópwoló an kúna riáfféú pokiten iten Jises.—Féf. 9:16.

² Pwal mwo nge ekkewe Chón Kraist iir soufós, ra ereni Paul pwe aramas repwe fééti me atolonga “lepéún aramasen ekkewe ekkóch mwú.” (Féf. 21:4, 10, 11) Ese pwen mwo, nge eú mwichen chón Jus ra sótun nieló, me ekiseló mwirin, ussun itá Paul epwele ninniiló ren án chóchóón án chón Jus we mwichen soukapwúng mi tekia ánini wóón. Iei ena aposel a kalapus fán nemenien ekkewe soufiun Rom me epwe pwal wor an kapwúng me a lamot epwe pwisin penaatá wóón met ekkewe ra tipimwáál ngeni wóón. (Féf. 21:31; 23:10) Ina popun, a lamot ngeni aposel Paul kapasen apéchékkúl!

3. Ia sia angei me ie kapasen apéchékkúl pwe sipwe sópweeló ach angangen afalafal?

³ Lón ei fansoun sópwólóón, sia silei pwe “iir meinisin mi mochen angang ngeni Kot fán túppwél me ákkáppirú Kraist Jises, repwe pwal kúna riáfféúmwáál.” (2 Tim. 3:12) Fán ekkóch, a pwal lamot ngenikich kapasen apéchékkúl pwe sipwe sópweeló lón ach angangen afalafal. Sia fókkun kilisou ren ekkewe kapasen emmwen mi torikich me lón néúch kewe puk me ach kewe mwiich mi kawor me ren ewe “chón angang mi túppwél me tipáchem”! (Mat. 24:45) Jiowa a pwon ngenikich pwe ekkewe chón oputakich resap sópwéch le nieló néún mwichen aramas me resap tongeni aúkatiw ach angangen afalafal. (Ais. 54:17; Jer. 1:19) Nge met a fis ngeni aposel Paul? Mi tori kapasen apéchékkúl pwe epwe sópweeló le unusen pwáraatá ewe kapas allim inaamwo iká a kúna riáfféúmwáál? Iká ina, iwe met a apéchékkúla Paul, me met a féri?

Eú “Pwon fán Ékképél” A Sópwongaw (Féffér 23:11-34)

4, 5. Ifa ewe kapasen apéchékkúl a tori Paul, me pwata a seréch?

⁴ A tori ewe aposel Paul ewe kapasen apéchékkúl mi lamot ngeni lón ewe pwinin mwirin an we ngaseló seni án chón Jus we mwichen soukapwúng mi tekia. Iei met Paipel a apasa: “Ewe Samol a útá únúkkún me apasa: ‘Kopwe tipepwora! Pún ussun chék óm unusen pwáraatá ussui lón Jerusalem, iwe, kopwe pwal pwáraatá me lón Rom.’” (Féf. 23:11) Seni án Jises kana kapasen apéchékkúl, Paul a lúkúlúk pwe i esap máló. A silei pwe epwe tikeri Rom me tufichin pwáraatá ewe enlet ussun Jises me ikena ie.

⁵ A fókkun seréch ewe kapasen apéchékkúl mi tori Paul. Lón ewe rán mwirin, lap seni 40 re Jus “ra ffératá eú raw me atolonger lón eú pwon fán ékképél, ra apasa pwe resap mwéngé are ún tori ar repwe nieló Paul.” Ena “pwon fán ékképél,” a pwáári pwe ekkena re Jus ra fókkun mochen nieló Paul. Ra lúkú pwe epwe wor och mettóch mi ngaw epwe fis ngeniir iká ese sópwéch ar na kókkót. (Féf. 23:12-15) Ekkewe souasor mi lap me ekkewe mwán mi ásimaw ra tipeeú ngeni ar we kókkót, ar repwe eliwinaló Paul ngeni án chón Jus we mwichen soukapwúng mi tekia pwe repwe tipin chosani. Nge atun repwe emmwenaaló Paul ngeni ena mwichen soukapwúng, ekkewe mwán repwe operi, turufi, me nieló.

6. Pwata Paul a silei ewe kókkót ar repwe nieló, me met ekkewe kúkkún me sáráfé lón ei fansoun ra tongeni káé seni ei pwóróus?

⁶ Iwe nge, tettelin néún Paul we a rong ewe angangen rawangaw me a apwóróusa ngeni Paul. Iwe mwirin, Paul a ereni ena át an epwe esile ngeni ewe meilapen mwichen soufiun Rom itan Klautius Lisias. (Féf. 23:16-22) Ewer, Jiowa a tongei ekkewe kúkkún me sáráfé mi ussun tettelin néún Paul ei ese affat itan, iir kewe mi pwora le túmúnú manawen néún Kot aramas lap seni pwisin manawer me túppwél le féri ese lifilifil met pwe repwe álisaatá angangen án Kot we Mwú.

7, 8. Ifa ewe kókkót Klautius Lisias a akkóta fán iten túmúnún Paul?

⁷ Klautius Lisias, i emén meilapen ewe mwichen soufiu iir 1,000 mwán. Iwe, atun a rong ussun ewe angangen rawangaw fán iten Paul, a ereni ekkewe 470 mwán, ekkóch iir soufiu, ekkóch mi wor wokur siles, me ekkóch iir chón wawa oris, ar repwe ló seni Jerusalem lón ewe pwinin me emmwenaaló Paul tori Seseria. Nge atun repwe tori Seseria, repwe uwealó Paul ren Governor Feliks.a Seseria, ina ewe iolapen mwúún Jutia lemwúún Rom. Iwe, inaamwo iká a wor chómmóng chón Jus ra nóm ikena, nge a fen kon chómmóng ekkewe chón lúkún Israel. Seseria a kinamwe, a fókkun sókkóló seni ewe watteen osukosuk lón Jerusalem, ikewe chómmóng aramas ra aapaap ngeni ekkewe pwal ekkóch lamalam me osukosuker. Seseria pwal ina leenien ewe mwichen soufiun Rom lón Jutia.    

⁸ Lisias a fiti allúkún mwúún Rom, me a tiinaaló eché taropwe ren Feliks mi áweweei ussun ewe case. Lisias a erá pwe atun a silei pwe Paul emén chón Rom, a seláni i atun ekkewe chón Jus itá “repwele nieló.” Lisias a erá pwe ese kúna och tipisin Paul epwe “fich ngeni máló are an epwe kalapus” ren, nge pokiten ewe angangen rawangaw fán iten Paul, i a tiinaaló ren ena governor pwe epwe rong ekkewe kapasen tipimwáál fán itan me apwúngaló met epwe fis.—Féf. 23:25-30.

9. (a) Ifa ussun Lisias a ú ngeni án Paul pwúúng lón an chón wiliposun Rom? (b) Ifa ussun sia tongeni alamota ach pwúúng lón ach chón wiliposun eú fénú?    

⁹ Mi enlet met ekkewe Lisias a makkeei? Esap kon meinisin. Ussun a mochen kútta itéchún me ren ewe governor. Ren enletin, ewe popun an seláni Paul esap pokiten an silei pwe i emén chón Rom. Pwal och, Lisias ese pwal fósun an we allúkú án Paul “epwe féfé ngeni ruuofóch sein” me pwal an allúkú pwe Paul “epwe etittin fán kawet.” (Féf. 21:30-34; 22:24-29) Lupwen Lisias a féri ena, a ú ngeni án Paul pwúúng lón an chón wiliposun Rom. Lón ei fansoun, Setan a néúnéú chókkewe mi tinikken lón ar lamalam chofona le eriáfféwúmwááli néún Kot aramas, me ra tongeni eppeti ach pwúúng le fel ngeni Kot. Nge néún Kot aramas ra ussun chék Paul, ra tongeni áeá allúkún fénúer le penaatá ar pwúúng le túmúnú pwisin iir pokiten iir chón wilipos.             

“Úa Pwapwa le Kapas pwe Úpwe Pwisin Penaeitá” (Féffér 23:35–24:21)

10. Ikkefa ekkewe kapasen tipimwáál mi chou ra tipi ngeni Paul?

¹⁰ Paul a “chék lokoló lón imwen Erot we” lón Seseria pwe epwe witiwiti án ekkewe chón etipisi repwe war me Jerusalem. (Féf. 23:35) Mwirin nimu rán, ewe Souasor mi Lapalap Ananaias, emén lawyer itan Tertullus, me eú kúmiin mwán mi ásimaw ra war. Tertullus a akkomw mwareiti Feliks ren met e féri fán iten ekkewe chón Jus. Ren enletin, a chék apaatái pwe epwe kúna chen me ren.b Mwirin, Tertullus a poputá le pwóróus wóón án Paul we case, a erá: “Ei mwán emén chón efisi osukosuk, mi efisi angangen efitikoko lein meinisin ekkewe chón Jus wóón unusen fénúfan, me i emén chón emmweni ewe mineféén lamalam án chón Nasaret. I a pwal sótuni an epwe epiningawa ewe imwenfel, ina minne áúa turufi i.” Ekkewe pwal ekkóch chón Jus ra “péchéúló pwe mi pwúng ekkeei mettóch.” (Féf. 24:5, 6, 9) Án emén efisi angangen efitikoko, emmweni ewe mineféén lamalam mi efeiengaw, me epiningawa ewe imwenfel a tongeni atoto ngeni an epwe kúna kapwúngún máló pún ekkena esin kapasen tipimwáál ra mmen chou.

11, 12. Ifa ussun Paul a pwáraatá pwe mi mwáál met ra tipi ngeni?

¹¹ Iei ra mut ngeni Paul an epwe kapas. A poputá ren an erá: “Ngang úa pwapwa le kapas pwe úpwe pwisin penaeitá.” A erá pwe ese fókkun pwúng ekkewe kapasen tipimwáál. Ena aposel ese epiningawa ewe imwenfel, ese pwal sótun efisi angangen efitikoko. A erá pwe ese nóm lón Jerusalem “fite ier” me a chék liwin pwe epwe uweato “liffangen úméúméch,” ekkewe liffang fán iten ekkewe Chón Kraist mi mwelele eli pokiten fisin lengita me riáfféúmwáál. Paul a péchéú le erá pwe mwen an tolong lón ewe imwenfel, a fen wes an “angangen elimelim me ren ewe Allúk” me a achocho le “eáni eú mwelien letip mi liméch mwen mesen Kot me aramas.”—Féf. 24:10-13, 16-18.

¹² Iwe nge, Paul a erá pwe i a eáni angang mi pin ngeni Koten semelapan kewe “me ren minne ra eita ngeni eú mineféén lamalam.” Nge a péchéú le apasa pwe a “lúkú meinisin ekkewe mettóch mi nóm lón ewe Allúk me makketiw lón makkeien ekkewe soufós.” Ussun chék ekkewe chón tipimwáál, i a pwal lúkú ewe ápilúkúlúk pwe epwe wor “eú manawsefál fán iten ekkewe mi pwúng me ekkewe rese pwúng.” Mwirin, Paul a ereni ekkewe chón tipimwáál ngeni ar repwe ánnetatá ar tipimwáál, a erá: “Mut ngeni ekkeei mwán ikeei ar repwe pwisin apasa met féfféringawei ra kúna atun úa útá mwen án chón Jus we mwichen soukapwúng mi tekia, chilóón chék ei eú mettóch úa kékkéwu fán léúwommóng atun úa útá leir: ‘Ikenái úa kúna kapwúng mwen mesemi pokiten ewe manawsefál án ekkewe mi máló!’”—Féf. 24:14, 15, 20, 21.

13-15. Pwata Paul i eú leenien áppirú mi múrinné ngenikich atun sipwe fós ngeni ekkewe néúwisin mwú?

¹³ Paul a isettiw eú leenien áppirú mi múrinné sipwe áppirú iká a wor eú atun mi lamot sipwe fós ngeni ekkewe néúwisin mwú pokiten ach fel me ekkewe kapasen tipimwáál mi iti ngenikich, áwewe chék ren ach apéchékkúla angangen akkachofesá are ú ngeni mwúún fénúach, are chóni eú “lamalam mi efeiengaw.” Paul ese ussun Tertullus le apaatái ewe governor pwe epwe kúna chen me ren. Paul a chék kinamwe me pwáári súfél. Atun a fós a pwáári kirekiréch, nge minne a apasa a fataffatéch me enlet. Paul a erá pwe ekkewe “chón Jus seni ewe fénú Eisia” mi erá pwe a elimengawa ewe imwenfel rese nóm, nge itá fán allúkún ewe mwú repwe nóm pwe repwe apasawu ar kapasen tipimwáál pwe Paul epwe rong.—Féf. 24:18, 19.

¹⁴ Nge ewe a kon aúchea seni ena, Paul ese niwokkus le pwáraatá met a eáni lúkú. A pwora le fóssefál ussun an lúkú ewe manawsefál inaamwo iká a efisi watteen osukosuk ewe atun a fós ussun mwen án chón Jus we mwichen soukapwúng mi tekia. (Féf. 23:6-10) Atun Paul a penaatá pwisin i, a menlapei ewe ápilúkúlúkún manawsefál. Pwata? Pún a afalafala ewe enlet ussun Jises me an manawsefál seni máló, ewe mettóch ekkewe chón ú ngeni rese fókkun mochen lúkú. (Féf. 26:6-8, 22, 23) Ren enletin, ewe wesewesen popun Paul a kúna kapwúng pún a lúkú ewe manawsefál, ákkáeúin manawsefálin Jises.

¹⁵ Sia tongeni ussun Paul le afalafal fán pwora me angei péchékkúl seni alon Jises ei ngeni néún kewe chón káé: “Aramas meinisin repwe oputakemi fán ásengesin itei. Nge ewe emén mi likiitú tori sópwólóón epwe kúna manaw.” Itá sipwe lólilen ren met sipwe apasa? Aapw, pún iei met Jises a alúkúlúkú ngenikich: “Lupwen repwe angeikemi pwe repwe uweikemiiló ngeni kapwúng, ousap aúreki me mwan met oupwe apasa, nge met mi kawor ngenikemi lón ena kulók, oupwe apasa, pún esap ámi ewe oua fóffós nge ewe ngún mi fel.”—Mark 13:9-13.

“Feliks A Niwokkus” (Féffér 24:22-27)

16, 17. (a) Met Feliks a apasa me féri atun a eáni kapwúng wóón Paul? (b) Pwata Feliks a niwokkus, me pwata a kan tiiti Paul an epwe feito ren?

¹⁶ Esap kerán iei án Governor Feliks epwe rong ussun met ekkewe Chón Kraist ra lúkú. Paipel a apasa: “Pokiten Feliks a fókkun sileéchú ekkewe mettóch ussun ei Al [eú it fán iten ekkewe Chón Kraist lóóm], a poputá le tiiniireló me apasa: ‘Ineet chék Lisias ewe meilapen mwichen soufiu epwe feitiw, úpwapw apwúngaló ekkeei mettóch mi weneitikemi.’ Iwe, a allúkú ngeni ewe meilapen soufiu pwe ewe mwán epwe chék ares nge epwe mut ngeni ekkóch mettóch a mochen féri, me mut ngeni chiechian kewe ar repwe álisi ngeni minne a osupwangan.”—Féf. 24:22, 23.

¹⁷ Mwirin fitu rán, Feliks a feito fán pwúlúwan we Trusilla, emén fin Jus, me a tiiti Paul me “aúseling ngeni an kapas ussun ewe lúkú lón Kraist Jises.” (Féf. 24:24) Iwe nge, lupwen Paul a kapas ussun “pwúng me nemeni pwisin mochenich me ewe ránin kapwúng epwele feito, Feliks a niwokkus,” ese mwáál a mengiringir ren ekkewe mettóch mi ngaw a féri. Ina popun a aúkatiw án Paul kapas, me apasa: “Kopwele mwo feiló iei, nge ineet úa pwal tufich ngeni úpwapw tiitisefál en.” Mwirin ena, Feliks a tiiti Paul fán chómmóng, esap pokiten an mochen silei ewe enlet, nge pokiten a áneán pwe Paul epwe uwou ngeni liffangen emichimich.—Féf. 24:25, 26.

18. Pwata Paul a fós ngeni Feliks me pwúlúwan we ussun “pwúng me nemeni pwisin mochenich me ewe ránin kapwúng epwele feito”?

¹⁸ Pwata Paul a fós ngeni Feliks me pwúlúwan we ussun “pwúng me nemeni pwisin mochenich me ewe ránin kapwúng epwele feito”? Chemeni pwe iir ra mochen silei met a lamot emén mi “lúkú lón Kraist Jises” epwe féri. Pokiten Paul a silei pwe Feliks me pwúlúwan na ra eáni manaw mi limengaw, kirikiringaw, me pwúngúngaw, iwe a affata met Kot a mochen án meinisin mi mochen tapweló mwirin Jises repwe féri. Minne Paul a apasa a pwáári watteen sókkofesenin án Kot allúk ussun minne mi pwúng me mwáál, me napanapen manawen Feliks me pwúlúwan we. Itá ena mettóch epwe fen álisiir le weweiti pwe Kot epwe apwúngú aramas meinisin ren met ra ekieki, apasa, me féri, me án Kot kapwúng wóór a kon aúchea lap seni met Feliks epwe apwúngaló fán iten Paul. A fókkun ffat ewe popun pwata Feliks “a niwokkus”!

19, 20. (a) Met sipwe féri iká chókkewe sia afalafal ngeniir ussun ra mochen silei ewe enlet nge ren enletin rese mochen ekkesiwili manawer? (b) Pwata sia silei pwe Feliks esap chiechien Paul?

¹⁹ Lón ach angangen afalafal, eli sipwe sereni ekkewe aramas mi ussun Feliks. Eli me lepoputáán sia ekieki pwe ra mochen silei ewe enlet, nge ren enletin rese mochen álleasochisi Kot me ekkesiwili manawer. Mi lamot sipwe túmúnúéch lón ach álisi ekkena esin aramas. Nge ussun chék Paul, fán kirekiréch sia tongeni áiti ngeniir met án Kot allúk ussun minne mi pwúng me mwáál. Neman ewe enlet lón Paipel a tongeni amwékútúúr ar repwe ekkesiwil. Iwe nge, iká a pwá pwe rese fókkun mochen úkkú seni ar féri ekkewe mettóch Jiowa a oput, sia chék likitiireló me ló kútta chókkewe mi enletin mochen silei ewe enlet.

²⁰ A pwá met wesewesen masouen letipen Feliks ren met ei wokisin a apasa: “Lupwen a fen luló ruu ier, Porkius Festus a siwili Feliks. Iwe, pokiten Feliks a mochen kúna chenin me ren ekkewe chón Jus, a likitaaló Paul lón kalapus.” (Féf. 24:27) Feliks esap i emén chiechien Paul. Feliks a silei pwe ekkewe Chón Kraist rese sótun ú ngeni ewe mwú are etipetipa ekkewe ekkóch ar repwe féri ena. (Féf. 19:23) A pwal silei pwe ese wor eú allúkún Rom Paul a atai. Iwe nge, Feliks a likitaaló Paul lón kalapus pwe epwe “kúna chenin me ren ekkewe chón Jus.”

21. Met a fis ngeni Paul mwirin án Porkius Festus a governor, me ia Paul a angei me ie an péchékkúl?

²¹ Ussun met sia kúna me lón ewe sáingoon wokisin lón Féffér sópwun 24, Paul a chúen nóm lón kalapus atun Porkius Festus a siwili Feliks le governor. Iwe, a poputá án Paul epwe kapas ngeni sókkopaten néúwisin mwú. Ra uwealó ena aposel mi tipepwora “mwen ekkewe king me governor.” (Luk 21:12) Ussun met sipwele káé lón en lesen, Paul epwele kapas ngeni emén sounemenem mi fókkun watte manan lón an we fansoun. Án Paul lúkú ese apwangapwangoló lón meinisin met ekkewe a fis ngeni. Sia lúkúlúk pwe a kúna péchékkúl seni alon Jises ei: “Kopwe tipepwora!”