Ifa Usun Aua Álisi Pwiim Kewe mi Nóm lón Weires?

Lupwen a fis feiengaw watte, ekkewe Chón Pwáraatá Jiowa ra mwittir akkóta ar repwe álisi pwiir kewe mi feiengaw. Ena angangen álillis a pwáraatá enletin ám tong lefilem. (Johannes 13:34, 35; 1 Johannes 3:17, 18) Ifa usun aua awora álillis?

Aua awora monien álillis. Lupwen eú lengita a tori Jutea, ekkewe Chón Kraist lóóm lón Antioch ra tiinaaló ar monien álillis fán iten pwiir kewe chón lúkú. (Föför 11:27-30) Pwal ina chék usun ikenái, lupwen aua silei pwe pwiim kewe lón ekkóch fénú ra nóm lón weires, iwe, me ren ám mwichefel, aua tiinaaló álillis pwe epwe kawor álillisin aion ngeni chókkewe mi fókkun osupwang.​—2 Korint 8:13-15.

Aua awora álillis mi lamot ngeniir. Ekkewe mwán mi ásimaw lón ekkewe leeni mi efeiengaw ra kútta emén me emén chón ewe mwichefel pwe repwe ppii ika iir meinisin mi túmún. Eú kúmien chón álisi mi feiengaw a tongeni akkótaéchú kaworen ekkewe mwéngé, konikin ún, úf, leeni, me minen álillis ren pekin sáfei. Chómmóng Chón Pwáraatá Jiowa mi sipeéch lón och sókkun angang mi lamot ngeni ekkewe chón feiengaw, ra pwisin feiló volunteer me álillis are fiti ewe angangen férsefállin ekkewe imw me Leenien Mwich mi ta. Aua tongeni mwittir akkóta le álisi ekkewe mi feiengaw pokiten ewe tipeeúfengen lón ám mwicheich me ám aua fen silefichi ifa usun aupwe angangfengen pun aua fen akkangangfengen. Inaamwo ika aua álisi ‘chokewe mi nom lon äm familien chon lükülük,’ nge ika mi tufich, aua pwal álisi aramas seni ese lifilifil menni lamalam.​—Kalatia 6:10.

Aua awora auruur seni Paipel me apéchékkúlatá letiper. A fókkun lamot auruur ngeni chókkewe mi kúna feiengaw. Lón ekkena atun, aua angei péchékkúl seni Jiowa, “ewe Kot mi echipakich lon mettoch meinisin.” (2 Korint 1:3, 4) Aua pwapwa le áiti ngeni iir kewe mi letipechou án Paipel kewe pwon mi alúkúlúkúúr pwe ekiseló chék, Mwúún Kot epwe áwesaaló meinisin feiengaw watte mi eriáfféw me áweires.​—Pwärätä 21:4.

• Pwata ekkewe Chón Pwáraatá ra tufichin mwittir awora álillis lupwen a fis feiengaw watte?

• Ifa usun aua awora auruur seni Paipel ngeni ekkewe mi kúna feiengaw?