LESEN 15
Pwata Kopwe Sópweló le Káé ewe Pwóróus Allim?
1. Ifa usun óm sópweló le káé ewe Paipel epwe álisuk?
Esor tipemwaramwar pwe óm káé ekkewe popun áitien Paipel a apéchékkúla óm tong ngeni Jiowa. A lamot kopwe ákkámááraatá ena tong. (1 Petrus 2:2) Óm ápilúkúlúkún manaw esemuch a lóngólóng wóón óm sópweló le arap ngeni Kot ren óm kákkáé an we Kapas.—Álleani Johannes 17:3; Jutas 21, TF.
Atun a lapoló óm silei Kot, a pwal péchékkúleló óm lúkú. Lúkú epwe álisuk le apwapwaai Kot. (Ipru 11:1, 6) Epwe amwékútuk le aier me féri ekkesiwili mi lamot lón manawom.—Álleani Föför 3:19.
2. Ifa usun óm silei usun Kot epwe álisi ekkewe ekkóch?
Ka tongeni eáni eú riri mi aúchea ngeni Jiowa
Ese mwáál ka mochen ereni aramas minne ka fen káé, pokiten kich meinisin sia kan pwapwa le apwóróusa och pwóróus mi allim. Atun ka sópweló óm káé Paipel, kopwe káé le néúnéú ewe Paipel le áweweei óm lúkú Jiowa me ewe pwóróus allim.—Álleani Rom 10:13-15.
Lape ngeni aramas ra poputá le apwóróusa ewe kapas allim ngeni chiener are aramaser kewe. Túmúnúéchú óm fós. Ereniir usun án Kot kewe pwon, lap seni óm ereniir pwe ar lamalam mi mwáál. Pwal och, chechchemeni pwe aramas ra kan ingeiti féfféréchum lap seni óm kapas.—Álleani 2 Timoty 2:24, 25.
3. Ifa ewe esin riri ngeni Kot kopwe pwapwaiti?
Óm kákkáé án Kot Kapas epwe álisi péchékkúlelóón óm riri ngeni Kot. Mwirin, ka tongeni eáni eú riri mi fókkun aúchea ngeni Jiowa. Iwe, ka tongeni wesewesen wiliti chóchóón chón án Jiowa we famili.—Álleani 2 Korint 6:18.
4. Ifa usun kopwe tongeni feffeitá?
Kopwe tongeni káé ifa usun kopwe apwénúetá án Paipel kapasen emmwen ren óm sópweló le káé án Kot we Kapas. (Ipru 5:13, 14) Tingorei emén Chón Pwáraatá Jiowa epwe káé ngonuk ren an néúnéú ewe puk, Met ewe Paipel A Wesewesen Apasa? Lapolóón óm káé án Kot we Kapas, epwe pwal ina lapolóón sópwéchún manawom.—Álleani Kölfel 1:1-3; 73:27, 28.
Ewe Paipel a masou ren “ewe kapas allim mi ling seni ewe Kot mi pwapwa.” (1 Timoty 1:11, NW) Kopwe pacheéch ngeni Kot ren óm chiechi ngeni néún kewe aramas. (Ipru 10:24, 25) Ren óm akkachocho le apwapwaai Jiowa, ka akkamwéchú ewe manaw mi enlet, ina ewe manaw esemuch. Óm pacheéch ngeni Kot, ina ewe mettóch mi enletin múrinné lap seni meinisin ka tongeni féri.—Álleani 1 Timoty 6:19.