Ese Pwal Wor Eú Alen Manaw mi Múrinné Seni

Met ka tongeni féri pwe kopwe arap ngeni Kot? Sia fen pwóróus usun ekkeei mettóch ren óm kopwe tongeni ámááraatá eú riri ngeni.

1. Silei me nénnéúnéú iten Kot we, Jiowa.

2. Fóffós ngeni i lón iótek me kákkáé an we Kapas, ewe Paipel.

3. Sópwósópwóló le féfféri met epwe apwapwaai Jiowa.

Iwe alóngólóng wóón ekkeei mettóch, ka tongeni erá pwe ka féri met a lamot pwe kopwe arap ngeni Kot? A wor ekkóch mettóch ka meefi pwe ka tongeni ámúrinnééló? Sia weweiti pwe a lamot achocho, nge ekieki ewe mwirilóón.

Jennifer seni Merika a erá: “Ese lusmwáál ewe achocho sia áeá fán iten epwe wor eú ririéch ngeni Kot. Pún ei riri epwe atoto chómmóng feiéch, áwewe chék epwe lapóló lúkúlúk wóón Kot, epwe lapóló weweiti napanapen kewe, nge lap seni meinisin epwe lapóló tongen Jiowa. Ese wor pwal eú alen manaw mi múrinné seni!”

Ika ka mochen pwapwaiti eú chiechiéch ngeni Kot, Chón Pwáraatá Jiowa ra pwapwa ar repwe álisuk. Ra tongeni akkóta pwe repwe káé ngonuk Paipel, nge ese kamé. Ka pwal ketiw óm kopwe fiti ar kewe mwich fán iten káéén Paipel lón ewe Leenien Mwich, ikewe ie kopwe pwapwaiti ewe chiechi ren chókkewe ra aúcheani ar ririéch ngeni Kot.a Óm féri ena, ka pwal tongeni meefieni meefien ewe soumak kélfel ren an a apasa: “Me rei, a mürina pwe üpwe kan ngeni Kot.”​—Kölfel 73:28.