Samuel A Féfféri Minne mi Pwúng

Seni lekúkkúnún Samuel, a nónnóm me angang lón ewe imwenfel mangaku, ikewe aramas ra etto pwe repwe fel ngeni Jiowa ie. En mi silei ifa usun Samuel a nóm lón ewe imwenfel mangaku? Sipwe mwo káé usun Hana, inen Samuel we.

Ren langattam fansoun, Hana ese tongeni néúnéú inaamwo ika a mochen epwe wor néún. Ina popun a iótek ngeni Jiowa me tingormaú an álillis. A pwonei pwe ika a néúnatiw emén át, iwe epwe tiinaaló pwe epwe nónnóm me angang lón ewe imwenfel mangaku. Jiowa a pélúweni an iótek me a néúnatiw emén át. A eita ngeni Samuel. Nge usun chék met Hana a fen pwonei, atun a úlúngát are rúáánú ierin Samuel, a uwealó lón ewe imwenfel mangaku pwe epwe angang ngeni Kot.

Ewe mwán itan Eli, i ewe souasor mi lap lón ewe imwenfel mangaku. Néún kewe rúúemén mwán ra pwal angang ikena ie. Chechchemeni pwe ewe imwenfel mangaku ina án Kot we imwenfel, iwe itá úrúrún ekkewe aramas repwe féri minne mi múrinné ikena ie. Nge néún Eli kewe ra féfféri minne mi fókkun ngaw. Samuel a kúna met ra féfféri. Nge ifa usun, Samuel a féri minne mi ngaw usun chék néún Eli kewe?— Aapw, a féfféri minne mi pwúng usun chék met seman kewe me inan ra áiti ngeni.

Óm ekiek nge itá úrúrún met Eli epwe féri ngeni néún kewe rúúemén?— Itá úrúrún epwe apwúngúúr. Me itá úrúrún esap mut ngeniir ar repwe angang lón imwen Kot we. Nge Eli ese féri ena, ina popun Jiowa a song ngeniir me néún kewe rúúemén. Iwe, Jiowa a filatá pwe epwe apwúngúúr.

Lón eú pwiin atun Samuel a méúr, a rongorong án emén kékkéri: ‘Samuel!’ Iwe a sááló ren Eli nge Eli a erá: ‘Use kéruk.’ Iwe a pwal fis fán ruu. Nge mwirin ewe aúlúngátin, Eli a ereni Samuel pwe ika a rongsefál ewe méngúngú, epwe apasa: ‘Jiowa, kese mochen kopwe kapas, ua aúseling.’ Ina met Samuel a féri. Iwe, Jiowa a ereni Samuel: ‘Kopwe ereni Eli pwe upwe apwúngú an we famili ren ekkewe mettóch mi ngaw ra féri.’ Óm lúkú pwe a mecheres ngeni Samuel an epwe ereni Eli ena pwóróus?— Aapw ese. Nge inaamwo ika Samuel a niwokkus, nge a féri minne Jiowa a apasa pwe epwe féri. A fis alon Jiowa. Néún Eli kewe rúúemén mwán ra niniló me Eli a pwal máló.

Samuel a eú leenien áppirú mi múrinné fán itach. A féri minne mi pwúng inaamwo ika a kúna án ekkóch aramas féfféri minne mi ngaw. Nge en? Kopwe usun Samuel me féfféri minne mi pwúng? Ika kopwe ina, iwe kopwe apwapwaai Jiowa me semom kewe me inom.