Jiowa A Fós Ngeni Samuel

Ewe Souasor mi Lapalap Eli a wor rúúemén néún át ra wiseni ewe wis souasor lón ewe imwenfel mangaku. Iter Hofni me Pineas. Rese álleasochisi án Jiowa kewe allúk me ra fókkun féfféringaw ngeni aramas. Atun ekkewe chón Israel ra kan uweato ar kewe asor ngeni Jiowa, Hofni me Pineas ra kan angei échún me lein ekkewe futuk fán iter. Eli a rong ussun met néún kena ra féri, nge ese féri och mettóch. Itá Jiowa epwe mut ngeni ena féffér an epwe sópwósópwoló?

Inaamwo iká Samuel a fókkun kúkkún seni Hofni me Pineas, nge ese áppirúúr. Jiowa a pwapwa ren Samuel. Lón eú pwinin atun a annut, Samuel a rong eú méngúngú a kéri itan. A pwáátá me a sááló ren Eli, me a ereni: ‘Ngang iei!’ Nge Eli a erá: ‘Úse kéruk. Feiló annutsefál.’ Samuel a konolósefál. Mwirin a pwal fissefál. Atun Samuel a rong ewe méngúngú fán úlúngát, Eli a mirititi pwe Jiowa ewe a kéri Samuel. A ereni Samuel pwe iká a pwal rongsefál ewe méngúngú, epwe apasa: ‘Kopwe kapas, Jiowa. Ngang noum chón angang úa aúseling.’

Samuel a feiló konolósefál. Mwirin a rong eú méngúngú: ‘Samuel! Samuel!’ A pélúweni: ‘Kopwe kapas, ngang noum chón angang úa aúseling.’ Jiowa a ereni: ‘Kopwe ereni Eli pwe ngang úpwe apwúngú i me an we famili. A silei pwe néún kewe át ra féri met mi ngaw lón ái we imwenfel mangaku, nge ese féri och mettóch.’ Sorotáán ewe rán Samuel a suuki ekkewe asamen ewe imwenfel mangaku, ussun met a kan féfféri. A niwokkus le ereni ewe souasor mi lapalap met Jiowa a ereni. Nge Eli a kéri me eisini: ‘Nei át, met Jiowa a erenuk? Kopwe ereniei meinisin.’ Iwe, Samuel a ereni Eli meinisin met Jiowa a ereni.

Atun Samuel a mámmááritá, Jiowa a sópweeló le nónnóm ren. Meinisin chón Israel ra silei pwe Jiowa a filaatá Samuel an epwe soufós me soukapwúng.