KINIKIN 2
Oupwe Tuppwélfengen Lefilemi
“Mine Kot a rifengeni, esap wor eman aramas epwe mwütifeseni.”—Markus 10:9
Jiowa a kútta senikich ach sipwe “tuppwel.” (Kölfel 18:25, TF) A fókkun lamot ei, pún ika ese wor tuppwél lón ámi pwúpwúlú, iwe ese pwal wor lúkúlúk. Me lúkúlúk ina met mi lamot pwe tong epwe péchékkúleló.
Ikenái, a kisikisiló án ekkewe pwúpwúlú tuppwélfengen. Mi lamot oupwe achocho le féri ruu mettóch pwe oupwe túmúnú ámi ririin pwúpwúlú.
1 AKKOMWA ÓM PWÚPWÚLÚ
MET EWE PAIPEL A APASA: “Filätä mine a fokun mürina.” (Filipi 1:10) Óm pwúpwúlú, ina eú me lein ekkewe mettóch mi fókkun aúchea lón manawom. A lamot kopwe akkomwa.
Jiowa a kútta sonuk óm kopwe akkomwa pwúlúwom we me “manaufengen fän pwapwa.” (Än Salomon Afalafal 9:9) A affata pwe kosap túmúnúngaw fán eú ngeni pwúlúwom nge ámi me rúúemén oupwe kúkkútta ifa usun oupwe apwapwafengenikemi. (1 Korint 10:24) Ámmeef ngeni pwe i a fókkun lamot me aúchea ngonuk.
MINNE KA TONGENI FÉRI:
Túmúnú pwe oupwe akkawora fansoun lefilemi me kosap osukosuk ren och mettóch atun oua chiechifengen
Kopwe ekieki ewe kapas “kich” lap seni ewe kapas “ngang”
2 TÚMÚNÚ LETIPOM
MET EWE PAIPEL A APASA: “Are eman mwän a nenengeni eman fefin o a mochenia ngeni, ätewe a fen tipisin lisowu ngeni ren an ekieki neminewe lon lelukan.” (Mateus 5:28) Ika emén a kan ekieki usun féffér mi limengaw, iwe weween ese tuppwél ngeni pwúlúwan.
Jiowa a apasa pwe mi lamot kopwe “tümwünü lelukom.” (Än Salomon Fos 4:23; Jeremaia 17:9) Ren óm kopwe féri ena, mi lamot kopwe túmúnú mesom. (Mateus 5:29, 30) Áppirú ewe semelap Hiop, ewe a féri eú pwonen etipeeú ngeni pwisin mesan pwe esap nennengeni pwal emén fefin fán mocheisou. (Hiop 31:1) Kopwe úppós pwe kosap fókkun katol sasingin me kachitoon kapasingaw. Kopwe tipeppós pwe kosap riri ngeni emén me lúkún pwúlúwom.
MINNE KA TONGENI FÉRI:
Kopwe affata ngeni aramas pwe ka enletin tuppwél ngeni pwúlúwom
Ekieki meefien pwúlúwom me mwittir áwesi ewe chiechi ika pwúlúwom we ese kinamwe ren