Ataween Osukosuk

Atun en me pwúlúwom oua poputá le nómfengen, sókkópaten osukosuk epwe ppiitá. Neman pokiten mi sókkóló ámi ekiek, memmeef, me sókkóló napanapen ámi féri mettóch pún mi sókkóló nónnómumi atun oua mááritá. Are ekkewe osukosuk ra feito seni ekkewe ekkóch me seni ekkewe mettóch mi weiweitá.

A mecheres ach sipwe tunaló ekkewe osukosuk, nge Paipel a erenikich pwe sipwe angang wóór. (Mateus 5:23, 24) Kopwe kúna ataween óm kewe osukosuk mi fókkun múrinné ren óm akkapwénúetá án Paipel kewe kapasen emmwen.

1 PWÓRÓUSFENGEN USUN EWE OSUKOSUK

MET EWE PAIPEL A APASA: “A wor . . . fansoun kakapas.” (Än Salomon Afalafal 3:1, 7) Túmúnú pwe oupwe awora fansoun le fós usun ewe osukosuk. Kopwe wenechar le esile ngeni pwúlúwom usun meefiom me met ka ekieki usun ewe osukosuk. Fansoun meinisin kopwe “eäni kapas wenechar” ngeni pwúlúwom. (Efisos 4:25) Ikaamwo atun a péchékkúl meefiom kewe, ú ngeni ewe mochen le ánini. Kapas pwetete a tongeni sópweló eú pwóróusfengen an esap wiliti eú watteen osukosuk.​—Än Salomon Fos 15:4; 26:20.

Ikaamwo kese tipeeú, kopwe chúen kirekiréch, kosap fókkun ménúkaaló le pwáraatá óm tong me súfél ngeni pwúlúwom. (Kolose 4:6) Achocho le mwittir ataweei ewe osukosuk me kosap úkútiw le pwóppwóróus ngeni.​—Efisos 4:26.

MINNE KA TONGENI FÉRI:

• Akkóta eú fansoun mi fich le pwóróus wóón ewe osukosuk

• Atun a tori óm fansoun le wisen aúseling, ú ngeni ewe mochen fósetá. Epwap tori óm fansoun le wisen fós

2 AÚSELING ME WEWEITI

MET EWE PAIPEL A APASA: “Oupwe tongfengen lefilemi . . . oupwe achocho le asamolu-fengenni-kemi.” (Rom 12:10, TF) A fókkun lamot napanapen óm aúseling. Achocho le weweiti ekiekin pwúlúwom we me fiti ‘lón an riäfföü’ me ‘kopwe tipetekisón.’ (1 Petrus 3:8, Agapé; James 1:19) Kosap chék tipitipin aúseling. Ika mi tufich, kopwe likitaló met ka féfféri me áfánniéchú pwúlúwom are tingor ika oua tongeni pwóróus usun lón pwal eú atun. Ika ka ekieki pwe pwúlúwom we ina i chienom nge esap appélúwom, iwe “kopwe sinei engino.”​—Än Salomon Afalafal 7:9, KG.

MINNE KA TONGENI FÉRI:

• Inaamwo ika minne ka rongorong ese apwapwaok nge kosap mwo awora óm ekiek atun ka aúseling

• Aúseling esap chék an fós nge pwal weweiti meefian. Weweiti mwékútún inisin me ngingiin an fós

3 SÓPWELÓ LE ANGANG WÓÓN

MET EWE PAIPEL A APASA: “Eman mi weires le angang epwe angei winnan, nge eman mi kapas chök epwe tolong lon osupwang.” (Än Salomon Fos 14:23) Ese naf ámi tipeeú ren ifa usun oupwe ataweei ámi osukosuk. Nge, a lamot oupwe sópweló le angang wóón met ámi me rúúemén oua tipeeú wóón. Eli epwe wewe ngeni ámi oupwe angang weires me achocho, nge mi wor lamotan. (Än Salomon Fos 10:4) Ika oua angangfengen usun eú kúmi, oupwe “feiöch” ren ámi angang weires.​—Än Salomon Afalafal 4:9.

MINNE KA TONGENI FÉRI:

• Apwúngaló ekkewe mettóch mi álilliséch minne emén me emén leimi epwe féri pwe epwe ataweei ámi osukosuk

• Fán ekkóch kopwe kan etittina ámi angang ika a feffeitá are ese