Aúrek​—Nóm fán Sókkópaten “Riaföü”

AÚREK a kkúú aramas meinisin, pwal mwo nge néún Kot kewe aramas. Ewe soumakken kélfel a makkeei: “A wor chomong ai öürek.” (Kölfel 94:19) Jesus a pwal erá pwe lón fansoun sópwólóón, ‘öürekin manau’ a tongeni kon áweiresikich lón ach angang ngeni Jiowa. (Lukas 21:34) Nge ifa usun en? Ka meefi pwe osukosuken famili, moni, are apwangapwangen inisum a chounuketiw? Ifa usun Jiowa a tongeni álisuk le likiitú?

“Tufich mi Somwola”

Sise tongeni likiitú fán aúrek ren chék pwisin ach péchékkúl. Aposel Paulus a makkeei: “Fän chomong aia küna riaföü . . . Fän ekoch aia tipemwaramwar, . . . aia kufula.” Nge a pwal erá: “Aisap fangatä,” “aisap apilükingau,” me “aisap feiengau.” Met a álisikich le likiitú? Ewe “tufich mi somwola,” ewe péchékkúl mi feito seni Jiowa, ach we Kot mi unusen manaman.​—2 Korint 4:7-9.

Ekieki ika ifa usun me lóóm ka angei ewe “tufich mi somwola.” Ka chechchemeni ifa usun eú afalafal mi apéchékkúl a alapaaló óm aúcheani án Jiowa tong mi enlet? A péchékkúleló óm lúkúlúk wóón án Jiowa kewe pwon lupwen ka áiti ngeni aramas ewe ápilúkúlúk usun ewe Paratis? Atun sia fiti án Chón Kraist kewe mwich me apwóróusa ngeni aramas minne sia lúkú, a álisikich le likiitú ngeni aúrekin manawach me meefi kinamween letipach le angang ngeni Jiowa fán pwapwa.

“Neni o Nengeni pwe ewe Samol mi Lapalap A Kirikiröch”

Ren enletin, neman ka meefi pwe a kon chómmóng met kopwe féri nge ese kii reom. Áwewe chék, Jiowa a mochen ach sipwe akkomwa ewe Mwú me akkóta manawach pwe sipwe tongeni apwénúetá wisach ngeni. (Mateus 6:33; Lukas 13:24) Nge epwe ifa ika och samau, osukosuken famili, are án aramas oputok pokiten minne ka lúkú a apwangapwangakoló? Are óm angang a angei watteen óm fansoun me péchékkúl pwe kese chúen tongeni fiti mwékútúkútún ewe mwichefel? Ren chómmóngun wisom, ese chúen naf óm fansoun me péchékkúl le ataweer meinisin, iwe ka meefi pwe usun itá kopwele kokoló lón óm osukosuk. Neman ka fen mwo nge meefi pwe a kon chómmóng mettóch Jiowa a kútta sonuk.

Jiowa a weweiti nónnómuch. Esap fán eú a kútta senikich met esap kii rech. Me a weweiti pwe ika sia apwangapwangoló mi lamot fansoun pwe sipwe meefi péchékkúlsefál lón pekin inis me memmeef.​—Kölfel 103:13, 14.

Áwewe chék, ekieki ifa usun Jiowa a túmúnú ewe soufós Elias. Jiowa a itá apwúngú Elias me ereni an epwe liwiniti wisan we lupwen a sú ngeni ewe fénúpéén pokiten watteen an lichippúng me niwokkusiti aramas? Aapw. Fán ruu Jiowa a tinaló emén chónláng an epwe féngúni Elias fán pwetete me amwéngééni. Nge mwirin 40 rán, Elias a chúen meefi niwokkus me aúrek. Met Jiowa a pwal féri ren an epwe álisi i? Áeúin, Jiowa a pwáraatá pwe a tongeni túmúnú i. Oruuan, Jiowa a oururu Elias ren “eu möngüngü mi leüökükün.” Sáingolóón, Jiowa a ereni Elias pwe mi chúen wor fitengeréú aramas mi tuppwél lón ar fel ngeni Kot. Iwe, ekiseló mwirin ena, Elias a achochosefál lón wisan we usun emén soufós mi tinikken. (1 King 19:1-19) Ifa ewe lesen? Lupwen a kon luló án Elias aúrek, Jiowa a mosonottam me úméúméch ngeni. Jiowa ese siwil. A pwal tongekich usun chék an tongei néún kewe aramas lóóm.

Lupwen ka ekieki met ka tongeni fang ngeni Jiowa, kopwe eáni ekiek pwúng. Kosap apépééi met ka tufichin féri iei ngeni met ka kan féri lóóm. Áwewe chék: Emén chón ssá ese chúen rensú ren fitu maram are fen ier esap tongeni chék mwittir liwinsefáliti ewe úkúkún rensú a eáni me akkomwan. Nge, epwe akkomw achocho ngeni mettóch mi tufich ngeni, iwe ekis me ekis epwe tongeni péchékkúleló. Ekkewe Chón Kraist ra usun chón ssá. Lón ar rensú ra fókkun silei met ra mochen achocho ngeni. (1 Korint 9:24-27) Pwata kese achocho ngeni eú mettóch ka meefi pwe ka tongeni tikeri iei? Áwewe chék, ka tongeni achocho le fiti mwich. Tingorei Jiowa an epwe álisuk pwe kopwe tikeri ena. Lupwen ka meefi pwe a péppéchékúleló óm lúkú, kopwe “neni o nengeni pwe ewe Samol mi Lapalap a kirikiröch.” (Kölfel 34:8) Chechchemeni pwe Jiowa a aúcheani mettóch meinisin ka féri pwe kopwe pwáraatá óm tong ngeni inaamwo ika usun itá mi chék kisikis.​—Lukas 21:1-4.

“Ewe Minen Apéchékkúl Ua Kan Wikkitiwiti”

Ifa usun Jiowa a apéchékkúla June an epwe liwiniti I? Iei met neminna a erá: “Ua tittingor ngeni Jiowa an epwe álisiei. Iwe, pwúlúwen nei we át a ereniei pwe epwe fis eú mwichelap lón sópwi we. Ua filatá ai upwe fiti eú ránin ena mwichelap. A ifa me watteen ai pwapwa le nómsefál lein néún Jiowa aramas! Ena mwichelap, ina ewe minen apéchékkúl ua kan wikkitiwiti. Iei, ua fókkun pwapwa le angangsefál ngeni Jiowa. Me rei, a lapóló aúchean manawei. Ua fókkun mirititi pwe use tongeni áláeménúló me sótun pwisin pwákini ai kewe osukosuk. Ua fókkun kilisou pwe a chúen suuk ngeniei ai upwe tongeni liwiniti Jiowa.”